10.9.4. Por alugamento da vivenda habitual

Os contribuíntes poderán deducir o 10 por 100, ata un máximo de 300 euros anuais, das cantidades satisfeitas no período impositivo en concepto de alugamento da vivenda habitual, sempre que cumpran os seguintes requisitos.

Requisitos:

1. Para a aplicación desta dedución deberán de cumprirse algunha das seguintes situacións:

   • Ter 32 anos ou menos na data de devindicación do imposto.

   • Estar no paro durante 183 días ou máis durante o exercicio.

   • Ter un grao de discapacidade igual ou superior ao 65 por 100.

   • Ser viúvo ou viúva e ter sesenta e cinco anos ou máis.

2. A base impoñible total, menos o mínimo persoal e familiar, non debe superar a contía de 20.000 euros en tributación individual e 30.000 euros en tributación conxunta. Este requisito é controlado polo programa.

3. As cantidades satisfeitas en concepto de alugamento deben exceder do 10 por 100 dos rendementos netos. Este requisito é controlado polo programa.

Familias numerosas

No suposto de que os contribuíntes pertenzan a unha familia numerosa o importe máximo deducible elevarase a 600 euros, sen que cumpra neste caso que se cumpran ningunha das situacións establecidas no punto 1 anterior.

Consideraranse familias numerosas as definidas pola Lei 40/2003, do 18 de novembro, de protección ás familias numerosas.

Tributación conxunta

No caso de tributación conxunta o importe máximo da dedución elévase a 600 euros.

En tributación conxunta abondará que un do cónxuxes cumpra os requisitos esixidos.

Importante:

1. Unha mesma vivenda non pode dar lugar á aplicación dun importe superior a 600 euros. Polo tanto, se en relación cunha mesma vivenda resultase que máis dun contribuínte ten dereito á dedución, cada un deles poderá aplicar na súa declaración unha dedución polo importe que se obteña de dividir a cantidade resultante da aplicación do 10 por 100 do gasto total ou o límite máximo de 600 euros, se procede, polo número de declarantes con dereito á dedución.

2. Os contribuíntes deben identificar o arrendador da vivenda facendo constar o seu NIF no recadro correspondente da xanela da dedución por alugamento.

Formalización

A través da xanela de captura de datos o contribuínte fará constar:

• O importe total satisfeito polo contribuínte titular da dedución polo arrendamento dunha mesma vivenda. O programa admite un máximo de tres vivendas.
• O número de persoas con dereito a aplicar a dedución por unha mesma vivenda.
• O NIF do arrendador. Se o arrendador non ten NIF, deberá consignar o Número de Identificación no país de residencia.
• Marcarase cunha "X"se estivo no paro máis de 183 días durante o exercicio 2017.
• Se o titular da dedución forma parte dunha familia numerosa consignarase "X" no recadro correspondente.

Nota: No caso de matrimonios en réxime económico de gananciais cando o contrato de alugamento só estea a nome dun do cónxuxes, os declarantes poderán optar entre aplicarse o 50% da dedución cada un deles , ou ben aplicar o 100% da dedución o titular do contrato.

O programa trasladará os datos incluídos do   anexo B6 da declaración.