Saltar ao contido principal
Modelo 100. Declaración do Imposto sobre a Renda das Persoas Físicas 2018

8.9.3. Dedución por dobre imposición internacional

Cando entre as rendas do contribuínte figuren rendementos ou ganancias patrimoniais obtidas e gravadas no estranxeiro, deducirase a menor das cantidades seguintes:

  1. O importe efectivo do satisfeito no estranxeiro por razón dun imposto de natureza idéntica ou análoga a este imposto ou ao Imposto da Renda de non Residentes sobre os devanditos rendementos ou ganancias patrimoniais.

  2. O resultado de aplicar o tipo medio efectivo de gravame á parte de base liquidable gravada no estranxeiro.

Con esta finalidade, o tipo medio efectivo de gravame será o resultado de multiplicar por 100 o cociente obtido de dividir a cota líquida total pola base liquidable. Para tal fin deberase diferenciar o tipo de gravame que corresponda ás rendas xerais e do aforro, segundo proceda. O tipo de gravame expresarase con dous decimais.

Cando se obteñan rendas no estranxeiro a través dun establecemento permanente practicarase esta dedución, e en ningún caso resultará de aplicación o procedemento de eliminación da dobre imposición prevista no artigo 22 do texto refundido da Lei do Imposto sobre Sociedades.

FORMALIZACIÓN

A través dunha xanela de captura de datos farase constar a seguinte información:

  • Tipo de renda obtida:

    Deberá seleccionar a clave 1 se se trata de rendementos do traballo ou de actividades económicas e a clave 2 se corresponde a outro tipo de rendas (resto de rendementos e ganancias patrimoniais).

  • Rendas incluídas na base impoñible xeral

    Abrirase unha xanela de captura de datos en que deberá indicar separadamente a contía das rendas obtidas e gravadas no estranxeiro incluídas na base impoñible xeral, tendo en conta o seguinte:

    1. Indicaranse os rendementos netos do traballo (ingresos íntegros menos os gastos deducibles) obtidos no estranxeiro.

    2. Indicaranse os rendementos netos reducidos de actividades económicas en estimación directa obtidos no estranxeiro.

    3. Indicaranse os rendementos netos reducidos do capital, os rendementos netos reducidos de actividades económicas en estimación obxectiva e as ganancias patrimoniais sometidas a tributación, obtidos no estranxeiro.

    4. Consignarase o importe efectivo do satisfeito no estranxeiro por razón de gravame de carácter persoal sobre o rendemento ou ganancia patrimonial.

  • Rendas incluídas na base impoñible do aforro

    Abrirase unha xanela de captura de datos en que se indicará a contía das rendas obtidas e gravadas no estranxeiro incluídas na base impoñible do aforro, tendo en conta o seguinte:

    • Resto de rendas incluídas na base impoñible do aforro.

      1. Se as rendas obtidas no estranxeiro teñen a consideración de rendementos do capital mobiliario, indicarase o importe do rendemento neto reducido obtido no estranxeiro. En caso de tratarse de ganancias patrimoniais, farase constar o importe da ganancia patrimonial sometida a tributación.

      2. Consignarase o importe efectivo do satisfeito no estranxeiro por razón de gravame de carácter persoal sobre o rendemento ou ganancia patrimonial.

O IMPORTE TEÓRICO DA COTA ÍNTEGRA

O importe teórico da cota íntegra será o seguinte:

  1. Cando o saldo resultante de integrar e compensar entre si os rendementos obtidos pola cesión a terceiros de capitais propias e de contratos de seguros de vida ou invalidez, aplicando os porcentaxes de redución previstos nos artigos 24.2, 94 e disposición transitoria sexta do texto refundido da Lei do Imposto sobre a Renda das Persoas Físicas na súa redacción vixente a 31 de decembro de 2006, sexa cero ou negativo, o importe teórico da cota íntegra será cero.

  2. Cando o saldo resultante de integrar e compensar entre si os rendementos previstos no apartado a) anterior, aplicando os porcentaxes de redución previstos nos artigos 24.2, 94 e disposición transitoria sexta do texto refundido da Lei do Imposto sobre a Renda das Persoas Físicas na súa redacción vixente a 31 de decembro de 2006, sexa positivo, o importe teórico da cota íntegra será a diferenza positiva entre a cota resultante de aplicar á suma da base liquidable xeral e do saldo positivo anteriormente sinalado o que se dispón nos artigos 63.1.1.º e 74.1.1.º da Lei 35/2006, e a cota correspondente de aplicar o sinalado nos devanditos artigos á base liquidable xeral.