O prazo prorrogarase a partir da entrada en vigor do real Decreto Lei

27 de marzo de 2008. O Goberno aprobará un Real decreto Lei coa finalidade de facilitar o cumprimento das obrigas fiscais relativas aos pagamentos fraccionados aos contribuíntes do Imposto sobre Sociedades, do Imposto sobre a Renda das Persoas Físicas que desenvolvan actividades económicas e estean obrigados a efectuar os correspondentes pagamentos fraccionados, así como aos contribuíntes do Imposto sobre a Renda de non Residentes polos establecementos permanentes situados en territorio español, con motivo da entrada en vigor do novo Plan Xeral Contable (PXC) o pasado 1 de xaneiro.

Preténdese mellorar a seguridade xurídica tras a entrada en vigor da nova norma. Conforme ao novo PXC, as empresas deben elaborar un balance de apertura do exercicio 2008 seguindo os novos criterios contables que se harmonizan con criterios internacionais, o que suporá realizar nalgúns casos, axustes ao valor de determinadas partidas do balance de peche do exercicio 2007, cuxa contrapartida se rexistrará en contas de reservas.

Estes axustes poden ter nalgúns casos plenos efectos fiscais, e polo tanto, deberán terse en consideración para a determinación da base impoñible do Imposto sobre Sociedades correspondentes ao exercicio 2008.

En atención ás dúbidas interpretativas xeradas por algúns aspectos do novo PXC, tendo en conta o curto prazo de tempo transcorrido desde a entrada en vigor da norma contable, o 1 de xaneiro de 2008, ata agora en que se inicia o prazo para efectuar o primeiro pagamento fraccionado do Imposto sobre Sociedades, o 1 de abril, é aconsellable ditar un Real decreto Lei que terá o seguinte contido:

• Prorrogará o prazo para a realización do primeiro pagamento fraccionado, agás o do Imposto sobre a Renda das Persoas Físicas en regimen de estimación obxectiva. O prazo habitual, vinte primeiros días do mes de abril, verase incrementado nun prazo adicional a partir da publicación do Real decreto Lei.
• Con independencia do método que aplicaba o contribuínte para o cálculo do pagamento fraccionado, regularase a posibilidade de optar entre as dúas alternativas seguintes:
  1. Utilizar o método previsto no artigo 45.2 do texto refundido da Lei do Imposto sobre Sociedades (TRLIS), aprobado polo Real decreto Lexislativo 4/2004, do 5 de marzo (BOE do 11 de marzo), é dicir, a utilización como base de cálculo do pagamento fraccionado a cota do período impositivo anterior.
  2. Utilizar o método previsto no artigo 45.3 do TRLIS , é dicir, a parte de base impoñible obtida nos tres, nove e once primeiros meses do ano 2008, coa excepción de non ter que incluír no devandito cálculo os efectos dos axustes derivados da primeira aplicación do novo PXC.

  Con esta medida póspónse ata agora de declaración os efectos fiscais derivados dos axustes necesarios para a adecuación ao novo Plan Xeral de Contabilidade e garántese un escenario de seguridade xurídica para o cumprimento das obrigas fiscais derivadas da existencia de pagamentos fraccionados.

A utilización do Real decreto Lei como instrumento xurídico resulta imprescindible xa que é necesaria a súa aprobación antes do 20 de abril de 2008, data que acaba o prazo de presentación do primeiro pagamento fraccionado.