- A organización defraudou polo menos 5 millóns de euros en dous anos cun esquema de sociedades ‘troitas’ e homes de palla.

- 14 detidos, outros tantos rexistros en domicilios e empresas, e diversas contas bancarias e caixas de seguridade bloqueada.

 A Axencia Tributaria desmantelou unha organización internacional dedicada á fraude ao IVE no sector informático. A trama, que contaba con ramificacións en varios países europeos, defraudaría polo menos cinco millóns de euros entre 2011 e 2012 mediante un esquema de sociedades ‘troitas’, ‘sociedades pantalla’ e homes de palla.

Tras case un ano de investigacións, no día de onte, baixo a dirección do xulgado de instrución número 5 de Vigo, funcionarios da Axencia Tributaria desenvolveron un amplo dispositivo que permitiu a detención de 14 presuntos membros da organización, así como o bloqueo de diversas contas bancarias e caixas de seguridade dos supostos implicados na trama.

A operación, denominada ‘Marcianitos’, arrinca cunha serie de investigacións iniciadas en abril de 2012 sobre un grupo de empresas dedicadas á fraude ao IVE no sector informático.

De acordo cos resultados da investigación conxunta desenvolvida por Vixilancia Aduaneira de Galicia (Unidade Operativa de Pontevedra e Unidade Fiscal Rexional) e a Dependencia Rexional de Inspección Financeira de Galicia (ONIF Galicia), en colaboración coa ONIF Central, os responsables da organización crearían unha trama para a defraudación ao IVE na comercialización de consolas para xogos e outros produtos informáticos, creando unha complexa estrutura empresarial con sociedades en España, Portugal e Romanía.

A trama desarticulada operaba mediante sociedades constituídas en Galicia, Madrid, Cataluña, norte de Portugal e Romanía, aínda que subministraba a distribuidores de toda España.

 O esquema da fraude

A mercadoría obxecto da fraude viaxaba directamente desde o norte de Europa (Dinamarca, Bélxica e Holanda) a almacéns loxísticos españois que, pola súa parte, remitíana aos comercializadores finais. Porén, para levar a cabo a fraude ao IVE interpúñanse neste esquema unha serie de sociedades creadas noutros países europeos (Portugal e Romanía) e en España.

A mecánica da fraude consistía en que os produtos, a pesar de viaxar directamente a España, eran facturados polas sociedades do norte de Europa a troitas remotas, creadas en Romanía e Portugal. Estas empresas eran, nominalmente, os primeiros receptores da mercadoría, limitandose a seu refacturación a outras sociedades ficticias españolas, que tampouco recibían as mercadorías e que, pola súa parte, refacturaban a outras sociedades españolas (sociedades pantalla), tamén creadas para a ocasión, que finalmente facturaban ás sociedades distribuidoras reais.

Desta maneira, mentres a mercadoría ía directamente desde unha sociedade do norte de Europa a un distribuidor español, a facturación realizábase seguindo un circuíto de que formaban parte, ademais do emisor e o receptor da mercadoría, ata tres intermediarios (sociedades troitas en Romanía e Portugal, troitas en España e sociedades pantalla en España).

Xa que, de acordo coa normativa comunitaria do IVE, non procede pagar este imposto indirecto nas compras intracomunitarias, pero si nas vendas interiores de España, as troitas españolas terían que ingresar unhas cantidades de IVE moi elevadas, ao non soportar IVE nas súas compras e si repercutiro nas súas vendas.

Porén, estas sociedades manipulaban os seus datos fiscais, creando cotas de IVE soportado ficticias, habilitando así a redución artificial da cantidade a pagar á Facenda Pública. Polo tanto, a fraude fiscal producíase no momento en que as troitas españolas, que recibían unha entrega intracomunitaria exenta e repercutían IVE na venda ás sociedades pantalla española, non ingresaban esas cotas do imposto en Facenda. Nos chanzos posteriores da facturación ficticia, as sociedades xa si soportaban IVE nas compras  e repercutíano nas vendas, como empresas normais, pero a trama xa conseguira ofrecer ao comercializador en España uns prezos inferiores aos dos seus competidores. A fraude misión pola troita española servía así para erosionar, á custa das arcas públicas, a libre competencia empresarial.

As estimacións das cantidades defraudadas por esta organización acadan as cifras de 3.300.000 euros en 2011 e, como mínimo (xa que aínda están pendentes de analizar as operacións das últimas semanas do ano), 1.700.000 euros en 2012.

 Homes de palla

Na investigación detectouse que unha parte importante desta organización criminal dedicábase á continua creación de sociedades troitas remotas, troitas en España e sociedades pantalla, para o que contactaban con persoas sen recursos ás que, a cambio dunha pequena remuneración, facían figurar como administradores destas sociedades ficticias. Incluso, nalgún caso, figuraban como administradores destas sociedades cidadáns que estaban cumprindo penas de cárcere no estranxeiro.

Así mesmo, para dar credibilidade aos movementos ficticios da mercadoría ­– que mentres, formalmente, comprábase e vendía entre sociedades de diversos países europeos, en realidade non se movía do almacén loxístico español ao que fora transferida inicialmente –, realizábase un continuo traspaso de diñeiro entre contas bancarias, todas elas operadas a través de Internet.

 Rexistros e detencións

No operativo desenvolvido onte realizáronse 14 detencións e outros tantos rexistros en domicilios dos detidos e en sedes de sociedades implicadas, coa seguinte desagregación:

Detencións :

1 en Guadalix (Madrid), 3 na Estrada (Pontevedra), 8 en Vigo, 1 en Melide (Coruña) e 1 en Arzúa (Coruña).

Rexistros :

- 6 domicilios de persoas físicas: 2 en Vigo, 1 na Estrada, 2 en Redondela (Pontevedra) e 1 en Madrid.

- 7 domicilios de sociedades relacionadas coa trama: 5 en Madrid (Alcorcón, Coslada e Guadalix de la Sierra) e 2 en Cataluña (Lleida e Cerdanyola).

- 1 asesoría en Ourense.

 Os rexistros e detencións acompáñanse de amplas medidas preventivos contra a organización criminal, incluíndo o bloqueo de saldos en contas bancarias e caixas de seguridade dos supostos implicados. Ademais, nos rexistros das sociedades interveuse un gran volume de documentación e hanse incautados ordenadores para, en próximos días, realizar o emborcado da información en presenza da autoridade xudicial, con vistas a practicar a análise oportuna.