Operación ‘Dragón’

• Máis de 370 funcionarios da Axencia Tributaria rexistran 61 locais en puntos clave para a introdución de mercadoría asiática en España como Cobo Calleja (Madrid), O Carrús (Alacant) ou Badalona Sud (Barcelona)
• As actuacións de Inspección, apoiadas por persoal dos Equipos de Fraude Organizada da ONIF , Auditoría Informática e Vixilancia Aduaneira, supoñen o inicio de comprobacións a 66 sociedades e 6 persoas físicas
• Tras seis meses de investigacións e a análise de multitude de inspeccións previas, concretouse unha operación a gran escala contra a fraude fiscal sobre empresas que están declarando unha marxe de beneficios ata 20 veces menores que o real no sector da importación e distribución  de produtos asiáticos

 

8  de  xuño de 2017.- A Axencia Tributaria puxo en marcha no día de hoxe unha operación coordinada a nivel nacional contra a fraude fiscal e a economía mergullada no sector da importación, distribución e venda de produtos procedentes da China e outras actividades complementarias. A denominada operación ‘Dragón’ implica o inicio de actuacións inspectoras sobre 66 sociedades e 6 persoas físicas en paralelo ao rexistro de 61 naves situadas en polígonos de 11 Comunidades Autónomas que son puntos clave para a introdución en España de mercadoría procedente de Asia, caso de Cobo Calleja (Fuenlabrada, Madrid), O Carrús (Elx, Alacant) e Badalona Sud (Barcelona), entre outros.

O dispositivo de entrada e rexistro, que se prolongará, polo menos, durante todo o día de hoxe, conta coa participación de máis de 370 funcionarios da Axencia Tributaria, incluíndo persoal da área de Inspección, Equipos de Fraude Organizada da Oficina Nacional de Investigación da Fraude (ONIF), Unidades de Auditoría Informática e axentes de Vixilancia Aduaneira, coa colaboración en determinadas zonas de Policía Nacional, Garda Civil e Mossos d ’Esquadra.

As actuacións iniciáronse por comparecencia da Inspección Tributaria nas sedes dos obrigados tributarios co fin de acceder directamente á documentación e información contable e auxiliar real, incluídos os sistemas electrónicos de procesamento da información. Ao tratarse de actuacións de carácter administrativo, non implican detencións.

Beneficios declarados 20 veces inferiores aos do sector

A operación ‘Dragón’ ten a súa orixe no dilatado coñecemento, por parte da Axencia Tributaria, a partir de multitude de inspeccións e investigacións efectuadas nos últimos anos, dos esquemas de actividade en ‘B’ que se veñen utilizando no sector da importación, distribución e venda de produtos asiáticos, e que levaron á determinación de enfocar o control destas actividades desde unha óptica global, a partir do éxito de anteriores operacións sectoriais a nivel nacional en distintos sectores de actividade.

Neste sentido, resultou moi relevante a achega da ONIF na clarificación da complexa mecánica defraudatoria existente neste sector, e en particular as experiencias adquiridas na operación de novembro de 2014 denominados ‘Xoguetes’, en relación coas mecánicas de introdución e importación de mercadorías sen declarar ou declarando a baixo custo, por medio de intermediarios especializados.

En concreto, as sociedades afectadas pola operación ‘Dragón’ viñan declarando unha marxe de explotación (beneficios sobre cifra de negocios) de apenas o 1,7% de media, 20 veces inferiores aos estimados para o conxunto do sector, xa que as investigacións previas veñen a determinar que a marxe real na actividade de importación e distribución deste tipo de produtos rolda o 40%.

Moitas destas empresas realizaban operacións millonarias e ampliaban o seu negocio mentres declaraban perdas de maneira sistemática. Pola súa parte  , en inspeccións previas a outras empresas do sector que se analizaron como antecedentes deste operativo, puidose comprobar que o 70% de todas as vendas e compras eran en ‘B’, proporción practicamente coincidente coa do uso de efectivo.

Contas ‘patera’ e facturas falsas de apoio

As investigacións previas permitiron constatar a existencia dun intenso movemento de efectivo que é ingresado en contas bancarias que os investigadores denominan ‘patera’, xa que serven de instrumento para que distintos empresarios do sector, sen necesidade de estar conectados entre si, envíen importantes remesas de efectivo, tanto aos seus provedores na China, como a outras contas dos propios empresarios no seu país de orixe.

Tamén comprobaran os investigadores, a partir do estudo das compras de particulares e retallistas nestes polígonos, a existencia dunha dobre operativa destas empresas en relación coa súa facturación. Por un lado, cando os seus clientes non lles esixían factura, directamente vendían en ‘B’. Por outro, cando realizaban vendas a tendas e negocios que declaraban correctamente, compensaban o ‘sobrecusto’ dos impostos xerados por estas vendas ‘oficiais’ mediante o provisión de facturas falsas para incrementar ficticiamente os seus custos.

Compras masivas en efectivo

Ao mesmo tempo, nalgúns dos polígonos obxecto desta actuación detectouse que numerosos empresarios retallistas e distribuidores acoden persoalmente a cargar mercadoría cos seus coches particulares ou pequenas furgonetas, efectuando en efectivo unha parte significativa dos pagamentos e eludindo así o que sería unha actividade comercial ordinaria, con pedidos seguidos de envíos ao cliente e posterior pagamento bancario destes pedidos.

A razón deste xeito de proceder non é outra que a vantaxe que obteñen estes clientes no prezo dos produtos, vantaxe que, en parte, é consecuencia do baixo prezo inicial na importación pero que, especialmente, débese á falta de pagamento dos impostos directos e especialmente do IVE que grava estas operacións. Non é estraño que os pagamentos se produzan en efectivo incluso por importes superiores ao máximo de 2.500 euros que admite a normativa.

Esta situación levou a que, canda o dispositivo principal despregado no interior dos locais obxecto dos rexistros e inspeccións, súmese un segundo dispositivo de control paralelo, mediante o cal se procede a identificar os transportes de mercadorías que teñen por orixe e destino o polígono, ao obxecto de verificar a posible existencia de mercadorías compradas ou vendidas en ‘B’ e actividades ilícitas no transporte.

Cara a un reaxuste integral do sector

Con todos estes antecedentes, e tras seis meses de investigacións sobre o colectivo seleccionado, puxo en marchase o dispositivo de entrada e rexistro da operación ‘Dragón’, que afecta a 61 locais das sociedades inspeccionadas en 11 Comunidades Autónomas: Andalucía (11), Aragón (1), Asturias (1), Baleares (2), Canarias (3), Castilla y León (4), Cataluña (13), Extremadura (1), Galicia (7), Madrid (8) e Comunidade Valenciana (10).

Os investigadores da Axencia Tributaria  estiman que os polígonos afectados polas actuacións distribúen máis do 50 %de todas as mercadorías que entran en España procedente da China en diversos segmentos dos sectores do téxtil, calzado, xoguetes, pequeno enxoval e papelaría, entre outros.

O obxectivo destas actuacións non pretende ser, exclusivamente, a regularización puntual das empresas inspeccionadas, senón tamén concienciar dunha forma permanente aos empresarios do sector de que esta forma irregular de funcionamento non pode continuar, e que a Axencia Tributaria emprendeu unha campaña de seguimento global das declaracións fiscais do colectivo.

De feito, aínda que esta operación se insire no plan de control da fraude de 2017, un obxectivo relevante da mesma é tamén evitar que esta forma de actuar persista, inducindo aos empresarios do sector a uns mellores comportamentos fiscais. Para iso, está previsto visitar adicionalmente outros comercios do mesmo ámbito, ao obxecto de verificar a súa forma de facturación e cobramento, aproveitando a experiencia previa da operación ‘Dragón’ en relación con diversas magnitudes da actividade, como as súas ratios reais, estruturas de custos, manexo do efectivo, canles de aprovisionamento e métodos de pagamento a profesionais e traballadores. A evolución do comportamento tributario do colectivo nos próximos trimestres será tomados en consideración á hora de definir futuros plans de control sobre o mesmo.