En relación coa compra de dereitos económicos de xogadores de fútbol e co financiamento de fichaxes e clubs

• A investigación, iniciada pola Fiscalía Especial contra a Corrupción e a Criminalidade Organizada, está dirixida polo Xulgado Central de Instrución núm. 5 da Audiencia Nacional
• Están participando un centenar de axentes da Unidade Central Operativa da Garda Civil (UCO) e funcionarios da Oficina Nacional de Investigación da Fraude (ONIF) da AEAT
• A investigación céntrase nas operacións levadas a cabo en España por un fondo de investimento con sede en Malta, que investiu na compra de dereitos económicos de xogadores de fútbol

17 de xullo de 2019.- Funcionarios da Oficina Nacional de Investigación da Fraude (ONIF) da Axencia Tributaria e axentes da Unidade Central Operativa (UCO) da Garda Civil, no marco da operación ‘Dean’, están levando a cabo distinto actuacións nas provincias de Madrid, Alacant, Valencia, Asturias, Sevilla, Cádiz, Granada, Murcia e Illes Balears, co fin de obter elementos probatorios de presuntos delitos fiscais e de branqueo de capitais.

Estas actuacións están baixo a dirección e coordinación do Xulgado Central de Instrución número 5 da Audiencia Nacional, quen ordenou a realización de varios rexistros en domicilios, así como requirimentos de documentación a múltiples sociedades.

A investigación iniciouse a principios do ano pasado centrandose nas operacións levadas a cabo en España por un fondo de investimento constituído no ano 2011 con sede en Malta.

As actividades deste fondo consistiron na compra de dereitos económicos de xogadores de fútbol con proxección, perseguindo lograr plusvalías cos seus traspasos a terceiros equipos. Así mesmo, financiou fichaxes e facilitou liquidez a clubs de fútbol español con dificultades económicas, todo iso baixo o asesoramento de bufetes de avogados.

Os acordos cos clubs de fútbol españois parecen ser negociados en España por dous representantes de futbolistas, quen poderían simular a súa residencia fiscal fóra de España, para non declarar á Facenda Pública os beneficios obtidos.

Máis de 5 millóns de euros

Para a comisión das fraudes detectadas utilizouse unha complexa estrutura societaria que permitiría ocultar os beneficios dos préstamos e da venda dos dereitos económicos dos xogadores de fútbol, cifrandose a cantidade supostamente defraudada á Facenda Pública española en máis de 5 millóns de euros.

De momento, son cinco as persoas investigadas e varias decenas prestarán declaracións testemuñais. Ademais, debido á repercusión internacional, solicitouse colaboración a varios países.