Grupo ‘Tadeus’

• O foro xorde co obxectivo de reforzar a cooperación das administracións tributarias europeas e desenvolver unha coordinación a nivel estratéxico a longo prazo
• Entre as materias debatida figura a necesidade de obtención de información das plataformas dixitais xeradoras de ingresos para os seus usuarios

2 de outubro de 2019.- A Axencia Tributaria participou na primeira reunión plenaria do grupo ‘Tadeus’ (Cimeira Europea de Administracións Tributarias), celebrada os pasados 17 e 18 de setembro en Helsinki. O foro contou coa presenza do director xeral da AEAT, Jesús Gascón, os seus homónimos da Unión Europea e o director xeral de Fiscalidade da Comisión Europea, Stephen Quest.

‘Tadeus’ xorde dos debates abertos o pasado ano pola Comisión Europea, os países membros e as súas administracións tributarias sobre a conveniencia de crear un foro de axencias tributarias ao máximo nivel que permita reforzar a cooperación das administracións e establecer unha coordinación estratéxica de accións no longo prazo.

Durante o encontro dedicouse especial atención á evolución de tres proxectos de estudo considerado prioritarios. No primeiro deles , referido á obtención de información das plataformas dixitais que facilitan transaccións xeradoras de ingresos para os seus usuarios, Gascón explicou a experiencia española en relación coa vixente obriga informativa para plataformas de alugamento vacacional.

Os outros dous proxectos analizados refírense á determinación do nivel de madurez da xestión dos recursos humanos nas administracións tributarias europeas, e á mellora tanto da confianza do contribuínte nas súas administracións, como do seu cumprimento voluntario.

De igual forma, nas reunións estudáronse novos posibles proxectos, caso dunha proposta francesa sobre medición da execución da cooperación administrativa, en que España mostrouse interesada en participar. Tamén se fixo un repaso do estado de todas as iniciativas de cooperación administrativa que están actualmente en marcha na UE, do seu desenvolvemento normativo e do papel que podería ter ‘Tadeus’ no deseño da súa estratexia e dos posibles pasos futuros.

Os directores presentes na primeira reunión plenaria de ‘Tadeus’ asinaron a declaración final da cimeira (anéxase en documento á parte) e fixaron a próxima reunión para o ano 2020 en Alemaña.