Operación conxunta da Axencia Tributaria, Policía Nacional e Policía Municipal de Madrid

• Doce persoas foron detidas, e outro oito están sendo investigadas, pola súa presunta pertenza a unha organización á que se lle interveu un total de 1.352.785 xoguetes e 2.727.946 unidades de produtos sanitarios
• Compraban os produtos desmontados na China e, unha vez introducidos no mercado español por diferentes medios, eran ensamblados principalmente nunha nave de Pinto para, posteriormente, distribuíros a diferentes partes do resto do país
• A operación levouse a cabo ante a proximidade do Nadal e, polo tanto, o considerable incremento no consumo deste tipo de produtos que pon en risco a saúde dos consumidores

18 de decembro de 2020.- A Axencia Tributaria, nunha operación conxunta coa Policía Nacional e a Policía Municipal de Madrid, desmantelaron un dos maiores centros de distribución de xoguetes e produtos sanitarios e hixiénicos ilegais da comunidade de Madrid. Un total de 1.352.785 xoguetes falsificados e 2.727.946 unidades de produtos sanitarios foron intervidos, entre outros efectos. Doce persoas foron detidas e outro oito están sendo investigadas pola súa suposta implicación nos feitos.

A operación levouse a cabo ante a proximidade das festas do nadal, en que o consumo de xoguetes e outros produtos vese incrementado de maneira considerable. Durante unha primeira fase, a Policía Municipal de Madrid realizou varias inspeccións e foron identificados diversos produtos que se estaban vendendo en tendas, cometendose, deste xeito, diferentes delitos contra o mercado dos consumidores e contra os dereitos de propiedade industrial.

A raíz desta información, os feitos foron postos en coñecemento da Policía Nacional e de forma conxunta coa Axencia Tributaria e a Policía Local comezouse a práctica das dilixencias oportunas ao obxecto de identificar os distribuidores, provedores e a orixe dos produtos que serían obxecto de delitos.

Na segunda fase, e tras a práctica de numerosas vixilancias coordinadas entre os corpos actuantes, identificouse plenamente aos integrantes do grupo criminal, o cal tiña o seu punto neurálxico e centro de distribución e fabricación nunha nave situada na localidade de Pinto.

Xoguetes que chegaban divididos en partes como medida de seguridade

A estratexia seguida polo grupo respondía a unha estrutura organizativa coñecida como ‘tea de araña’. Desta maneira, compraban os produtos na China e, unha vez introducidos no mercado español por diferentes medios, de forma fraccionada e por pezas, eran montados principalmente na nave de Pinto para, posteriormente, redistribuíros a diferentes puntos de venda do Polígono Cobo Calleja. Estes, pola súa parte, exercían de provedores deses mesmos produtos a outros vendedores de diferentes partes do resto do país.

Os obxectos chegaban a España desmontada en diferentes bloques e eran montados nas naves de Cobo Calleja e Pinto. As diferentes partes dos xoguetes chegaban en distintos envíos, distintos días e, por veces, empregando diferentes portos e aeroportos de entrada. Esta desmembración constitúe en si mesma unha medida de seguridade que ten como finalidade dificultar a detección dos produtos vulneradores nas aduanas europeas.

No establecemento aberto ao público, os comerciantes dispuñan, atendendo ao volume final intervido, da cantidade xusta para responder á demanda diaria. No caso de non contar coa existencia necesaria, ou ante un pedido de grandes dimensións, contaban cun equipo de transporte e recollida que se desprazaba ás naves de almacenaxe para aprovisionarse do produto necesario.

Antes de chegar o produto aos diferentes redistribuidores, o grupo realizaba distintos labores previos en varias naves. Desta maneira, localizouse unha nave onde había un tráiler realizando labores de descarga, outra nave de almacenaxe cos produtos listos para a súa distribución e outra nave onde se fabricaba o produto final montando as distintas partes que se recibiran do mesmo.

Nestas naves-almacéns, pechadas ao público, acumulábase a maioría dos produtos, sendo unha delas o principal centro de produción e onde, ademais de acharse centos de miles de xoguetes e máscaras almacenadas, encontrábanse distintos operarios encargados da custodia, montaxe e almacenaxe dos produtos.

Gran volume de produtos ante a proximidade do Nadal

O enorme volume que estes comerciantes planeaban xestionar nestes días previos á campaña do nadal pon de manifesto a extraordinaria rendibilidade que se obtén coa venda destes produtos. A variedade e a cantidade dos produtos intervidos, un total de 1.352.785 xoguetes falsificados, fai imposible establecer, de momento, unha contía exacta dos beneficios que se obterían, estimando os investigadores que, a baíxaa, o termo medio da ganancia por xoguete rolda os cinco euros. Isto suporía un total de máis de 6.810.000 euros. Do mesmo xeito, o termo medio de ganancia por produto sanitario rolda o euro, o que achegaría un beneficio total de 2.727.946 euros.

Durante esta operación foron detidas doce persoas, mentres que outro oito están sendo investigadas pola súa suposta implicación nos feitos. Ademais dos xoguetes e os produtos sanitarios, interviñéronse 19.300 euros en efectivo. 

Na fase de explotación da operación contouse coa participación de inspectores da Área de Consumo e Calidade da Comunidade de Madrid, ao obxecto de identificar e certificar as diferentes disfuncións e riscos para a saúde que había nos diferentes produtos localizados. 

Filmación do operativo (para descargar o vídeo débese introducir o seguinte enderezo web):  https://we.tl/t-wp6g2GA3tk