Saltar ao contido principal

Interceptado en augas próximas a Canarias un buque cargado con 20 toneladas de hachix

Operación conxunta da Axencia Tributaria e Policía Nacional

  • Detidos os 11 tripulantes da embarcación, de nacionalidade siria, tras a abordaxe realizada por dúas patrulleiras de Vixilancia Aduaneira da Axencia Tributaria a 40 millas ao sueste de Fuerteventura
  • O mercante corría un serio risco de afundimento, ao contar con importantes vías de auga e deficiencias no motor

10 de agosto de 2021.- Unha investigación conxunta da Axencia Tributaria e Policía Nacional permitiu interceptar en augas próximas a Canarias un buque mercante cargado con case 20 toneladas de hachix.Tras a abordaxe realizada por dúas patrulleiras de Vixilancia Aduaneira da Axencia Tributaria foron detidos os 11 tripulantes da embarcación, de nacionalidade siria.Tras subir a bordo, os funcionarios detectaron que o mercante se encontraba en serio risco de afundimento, ao contar con importantes vías de auga e deficiencias no motor.

O buque, de bandeira de Palau, era obxecto dunha investigación conxunta de Vixilancia Aduaneira da Axencia Tributaria e Policía Nacional no marco da operación denominada ‘Natalia’, así como dos servizos aduaneiros franceses DNRED.

Tras detectar a proximidade do mercante ás augas de Canarias decidiuse a súa urxente interceptación, polo que dúas patrulleiras do Servizo de Vixilancia Aduaneira, a ‘Sacre’ e o ‘Falcón’, partiron na noite do sábado 7 en busca do obxectivo, que resulta abordado nas primeiras horas do domingo a unhas 40 millas ao sueste de Fuerteventura, en augas internacionais.

Risco de afundimento

Unha vez controlado e asegurado o buque por parte dos funcionarios de presa de Vixilancia Aduaneira, o mal estado do buque, con múltiples vías de augas e risco de incendio en máquinas obrigou a un arduo traballo os funcionarios de ambas as dúas patrulleiras para mantelo a flote e conseguir chegar finalmente na noite do domingo ao porto de Las Palmas.

Ao longo do día de onte, funcionarios de Vixilancia Aduaneira e axentes de Policía Nacional procederon ao rexistro conxunto do mercante.Como sospeitaban os investigadores de ambos os dous corpos, ademais de realizar un transporte ordinario de xeso, o mercante portaba unha gran carga de hachix, que se encontraba oculta nas súas adegas.Os operativos contabilizaron un total de 638 fardos que suman 19.876 quilos de hachix, o que supón outro alixo de gran relevancia interceptado este ano en augas próximas a Canarias.

Os 11 tripulantes detidos serán postos a disposición xudicial da Audiencia Nacional nas próximas horas, ao tempo que tanto a Autoridade Portuaria coma Capitanía Marítima do porto de Las Palmas se fixeron cargo da nave avariada, auxiliados polos funcionarios de Vixilancia Aduaneira, para os efectos de minimizar as vías de augas.

Filmación do operativo (para descargar o vídeo e as fotografías débese introducir a seguinte dirección web):

https://we.tl/t-PSNA6JvP7e