Operación conxunta da Axencia Tributaria e a Garda Civil

• A droga viaxaba nunha partida procedente de República Dominicana declarada como froita fresca

• Os axentes localizaron o ‘gancho perdido’ nas inspeccións que se realizan de maneira cotiá no aeroporto Adolfo Suárez Madrid-Barajas

5 de decembro de 2023.- No marco dos dispositivos establecidos no aeroporto Adolfo Suárez Madrid-Barajas, funcionarios de Vixilancia Aduaneira da Axencia Tributaria e axentes da Garda Civil, lograron intervir 530 quilos de cocaína que viaxaba oculta nunha partida de froita fresca desde a República Dominicana.

A intervención tivo lugar o pasado sábado 2 de decembro, no marco das inspeccións que se realizan á mercadoría que chega ao noso país a través do aeroporto internacional, tras detectar unha posible manipulación nunha partida declarada como froita fresca cando se procedía ao despacho por parte das Autoridades Aduaneiras.

A partida composta por tres palets que albergaban 38 caixas de aguacates tiña un peso total de 2.268 quilos. En todas as caixas viaxaba algún dos paquetes que contiña droga.

Gancho perdido’ ou ‘rip off’

Este método é utilizado polos traficantes para intentar introducir grandes cantidades de droga no aeroporto de orixe, con descoñecemento das empresas importadoras e exportadoras. Buscan envíos de mercadorías de empresas legais de importación cun fluxo constante de envíos buscando pasar desapercibidos para os vixiantes aduaneiros.

Unha vez a mercadoría chega ao punto de destino contan con persoas que retiran a mercadoría antes de que sexa despachada, logrando facerse cunha gran cantidade de droga sen correr riscos.

No operativo participaron funcionarios de Vixilancia Aduaneira da Axencia Tributaria e axentes da Garda Civil do aeroporto Adolfo Suárez Madrid-Barajas.