Operación da Axencia Tributaria, Garda Civil e Policía Nacional

• As dúas embarcacións foron abordadas polo Buque de Operacións Especiais ‘Fulmar’ do Servizo de Vixilancia Aduaneira

8 de marzo de 2023.- A Axencia Tributaria, no marco dunha operación conxunta con Garda Civil e Policía Nacional, interceptou en augas ao oeste das illas Canarias un veleiro, de nome ‘My Love’ que portaba unha carga de cocaína. Tras a abordaxe por parte do Buque de Operacións Especiais ‘Fulmar’ do Servizo de Vixilancia Aduaneira da Axencia Tributaria, procedeuse á detención dos dous tripulantes, de nacionalidade española.

A tripulación e o veleiro foron trasladados ata o porto de Tenerife para a súa posta a disposición xudicial. No marco doutra investigación, abordouse un segundo veleiro, tamén con estupefaciente, de maneira que a cantidade intervida nos dous veleiros suma un total de máis de 1.100 quilos de cocaína

No marco das actuacións de vixilancia e prevención que se realizan habitualmente, e a través do sistema de comunicación internacional entre o MAOC-N e o CITCO recíbese información da DEA dos EUA, coa colaboración da NCA británica que indicaría que un veleiro denominado ‘My Love’ podería encontrarse preto da posición do buque ‘Fulmar’. Como consecuencia do anterior, o patrulleiro do Servizo Vixilancia Aduaneira recibe instrucións para dirixirse en demanda cara a esa embarcación, que é localizada e abordada na tarde do 3 de marzo, a unhas 350 millas de Santa Cruz de Tenerife.

Na embarcación ‘My Love’ con pavillón de Bélxica, podíase observar a simple vista que transportaba unha cantidade indeterminada de fardos dos utilizados habitualmente para o transporte de cocaína. Tras contar coa autorización das autoridades belgas procédese a abordar o veleiro, á incautación da cocaína que portaba a embarcación e á detención dos seus dous tripulantes, de nacionalidade española. Esta operación foi dirixida e coordinada pola Fiscalía Antidroga da Audiencia Nacional e o Xulgado Central de Instrución número 5 da Audiencia Nacional.

Dificultades de abordaxe e remolque

Dáse a circunstancia de que o Buque ‘Fulmar’ encontrábase inmerso noutro operativo froito do que se interviñera previamente un primeiro veleiro que portaba tamén cocaína, e que estaba sendo remolcado con destino ás illas Canarias no marco dunha investigación conxunta dos tres corpos policiais, actuación que continúa aberta.

As condicións de ambos os dous asaltos resultaron moi complicadas, debido, no primeiro caso, á situación do mar, e no segundo, ao hándicap de levar a remolque ao primeiro veleiro intervido, o que fixo que as manobras resultasen moito máis dificultosas.

A pesar diso , a rápida actuación e experiencia dos axentes do SVA actuantes impediu que se producisen incidentes e permitiu o éxito da operación nunha das escasas ocasións en que se leva a cabo unha dobre intervención nun mesmo operativo naval.

Tanto os detidos, como as embarcacións, a droga e as dilixencias policiais pasarán a disposición xudicial. Estas operacións son dous máis das efectuadas polos efectivos dedicados á represión do narcotráfico na denominada ‘Ruta Atlántica’ da cocaína, coñecida por ser utilizada por pesqueiros, mercantes e, como neste caso, veleiros procedentes de América do Sur que pretenden a introdución do estupefaciente no continente europeo.