Operación da Axencia Tributaria contra o tráfico de drogas

• Axentes do Servizo de Vixilancia Aduaneira da Axencia Tributaria descubriron na madrugada do luns tres furgonetas que transportaban a droga tras alijar nunha cala do norte da illa

• Os narcotraficantes, ao detectar o vehículo de Aduanas, frearon bruscamente, provocando un choque entre as furgonetas, e emprenderon a fuxida

• Os recentes apresamentos indican un aumento no Mediterráneo e as Baleares da actividade das organizacións criminais que introducen haxix desde o norte da África, habitualmente mediante embarcacións pneumáticas semiríxidas de alta velocidade

25 de outubro de 2023.- Axentes do Servizo de Vixilancia Aduaneira da Axencia Tributaria en Eivissa, no marco dunha operación de control de costas, interviñeron 8.300 quilos de haxix na madrugada do 22 ao 23 de outubro pasado, tras descubrir in fraganti a unha organización que transportaba a droga en vehículos implicados nun alixo efectuado na zona norte da illa. Trátase da maior incautación histórica de haxix realizado nas Illas Baleares ata agora.

Os funcionarios de Vixilancia Aduaneira estaban desenvolvendo unha vixilancia en patrulla terrestre ao longo da costa de Eivissa, cando detectaron tres furgonetas de gran capacidade e almacenaxe circulando case sen luces por unha estrada que une Sant Joan de Labritja cunha das calas deste municipio.

Os condutores das tres furgonetas, ao detectar o vehículo policial de Aduanas, frearon bruscamente, producindose un choque entre elas, e os ocupantes emprenderon a fuxida a través do bosque.

Inmediatamente, ante os indicios de encontrarse cunha operación de alixo de estupefacientes en praia, a patrulla de Aduanas solicitou apoio a todas as unidades de Vixilancia Aduaneira, que acudiron de forma urxente ao lugar e comezaron a realizar batidas pola zona para descubrir aos implicados nos feitos.

As investigacións seguen abertas e non se descartan detencións nos próximos días.

As tres furgonetas intervidas ían cargadas cunha gran cantidade de vultos de tea de saco, dos utilizados comunmente para o tráfico de haxix por vía marítima. En conxunto, os axentes incautaron un total de 216 vultos de haxix cun peso bruto aproximado de 8.300 quilos de haxix.

Os investigadores estudan a posibilidade de que a organización criminal utilizase a illa de Eivissa como punto de recepción temporal da droga para a súa posterior redistribución a outros puntos do continente europeo.

Incautación histórica nas Baleares

Este apresamento supón o maior alixo deste tipo de substancia estupefaciente incautado na historia de Baleares, superando así a intervención da embarcación ‘Sol de España’, interceptada en 2001 en Cala Ratjada, e que transportaba 7.700 quilos de haxix.

Esta actuación en Eivissa coincide temporalmente co apresamento en Mallorca doutros dous fardos de 35 quilos durante a tarde do domingo 22 de outubro, que foron descubertos flotando na costa de Andratx e recuperados pola patrulleira ‘Paiño’ do Servizo de Vixilancia Aduaneira.

Cabe, por outra banda, lembrar a similitude desta incautación co alixo de 875 quilos de haxix aprehendido pola Unidade Combinada de Vixilancia Aduaneira de Eivissa en febreiro deste mesmo ano no norte de Eivissa nun operativo policial de análogas características.

Os recentes apresamentos indican un aumento no Mediterráneo e as Baleares da actividade das organizacións criminais que introducen haxix desde o norte da África, habitualmente mediante embarcacións pneumáticas semiríxidas de alta velocidade.