Operación conxunta da Axencia Tributaria, Policía Nacional e OLAF

• Sete detidos e oito rexistros en instalacións e domicilios da organización, que importaba o produto desde China para a súa distribución en España e Italia
• A rede daba ás súas compras a aparencia de operacións comerciais lícitas e vendía a mercadoría mediante empresas interpostas a maioristas habituais dos produtos xenuínos

12 de agosto de 2024.- A Axencia Tributaria, nunha operación conxunta con Policía Nacional e a Oficina Europea de Loita Antifraude (OLAF), interveu en Alacant e Murcia máis de 260.000 coitelas de afeitar falsificadas dunha coñecida marca que ían ser introducidas no circuíto comercial. No marco desta operación procedeuse á detención de sete persoas de nacionalidades españolas e italianas e leváronse a cabo oito rexistros en instalacións e domicilios da organización responsable en España e Italia, países onde a rede criminal distribuía a mercadoría a través de maioristas habituais dos produtos xenuínos que previamente adquirira na China.

Os produtos intervidos teñen un valor de mercado superior ao millón de euros e tiñan por destino as cadeas de subministración legais, ás que a organización ocultaba mediante unha estrutura de empresas interpostas que estaban adquirindo produtos falsificados.

A investigación iníciase por parte do Servizo de Vixilancia Aduaneira (SVA) da Axencia Tributaria en Alacant a partir de informacións recibidas pola Oficina Europea de Loita Contra a Fraude (OLAF) sobre unha expedición de coitelas de afeitar dunha coñecida marca procedente da China e que poderían ser falsificadas, con destino a almacéns situados en España e Italia.

As actuacións realizadas por Vixilancia Aduaneira de Alacant, permitiron establecer o ‘modus operandi’ e os lugares de almacenaxe da organización criminal para a distribución de coitelas de afeitar falsificadas por todo o territorio nacional.

Posteriormente, está investigación do SVA en Alacant confluíu con outra aberta pola UDEV Central da Policía Nacional tras unha denuncia efectuada ante a Policía polos titulares da marca rexistrada sobre esta mesma organización. A partir dese momento, tanto a OLAF, como Vixilancia Aduaneira, Policía Nacional e a Garda de Finanza de Italia coordináronse para levar conxuntamente a investigación.

Entradas e rexistros en España e Italia

As actuacións previas culminaron o pasado 2 de xullo con cinco entradas e rexistros en empresas, locais de almacenaxe e domicilios particulares de Alacant, Murcia e Barcelona, así como tres locais comerciais e empresas con sede en diferentes localidades de Italia. En tres almacéns de Alacant e Murcia interviñéronse un total de 266.656 coitelas de afeitar (66.664 packs de catro coitelas cada un), que xa foron acreditadas pola marca como produto falsificado. Igualmente, procedeuse á intervención dun vehículo de alta gama rexistrado a nome dunha das empresas da trama delituosa.

No contexto destes rexistros procedeuse á detención de sete persoas como responsables destas actividades ilícitas – seis de nacionalidade española e unha italiana – en Alacant (4), Murcia (2) e Barcelona (1), por presuntos delitos contra a propiedade industrial, branqueo de capitais e pertenza a organización criminal.

Posteriormente, o pasado 12 de xullo, unha vez finalizadas as primeiras actuacións, detectouse a chegada a Alacant dunha nova expedición de coitelas de afeitar falsas, que foi tamén intervida e posta a disposición xudicial. Tratábase nesta ocasión dunha expedición 14.400 coitelas de afeitar (4.800 packs de tres coitelas cada un) e, ademais, nesta ocasión, a expedición incluía 3.960 unidades de recambios de cepillos dentais, que, en ambos os dous casos, foron identificados polos titulares das respectivas marcas como mercadorías falsificadas.

 O total de mercadorías falsificadas intervidas en España é o seguinte:

• 281.056 coitelas de afeitar
• 3.960 recambios de cepillos dentais

 Doutra banda, a Oficina Europea de loita Contra a Fraude (OLAF), comunicou, que, dentro desta mesma investigación, noutros países da Unión Europea (Alemaña, Holanda, Grecia e Italia), interviñéronse tamén un total de 644.240 coitelas de afeitar falsificadas.

En relación coa OLAF a investigación iniciouse tras recibir intelixencia sobre unha organización dedicada á introdución de coitelas falsificadas na UE procedente da China. A OLAF realizou o seguimento dos envíos sospeitosos, identificando as empresas destinatarias a nivel da Unión Europea, comunicando as informacións obtidas aos países involucrados e actuando así mesmo na coordinación das investigacións que se levaron a cabo en relación con este caso.

Estrutura de sociedades interpostas

As compras realizábanse directamente á empresa subministradora da China utilizando medios telemáticos. O prezo pactado pola venda enviábase por SWIFT bancario desde España ou Italia a China, dando a aparencia dunha operación comercial regular.

A mercadoría remitíase polo exportador chinés declarando como lugar de destino almacéns (rochos) alugados pola principal persoa responsable da actividade ilícita, utilizando empresas interpostas como destinatarias.

A partir da recepción nos rochos, as mercadorías falsificadas enviábanse a empresas comerciantes por xunto deste tipo de produtos localizados en España e Italia. Os maioristas, pola súa parte, vendían a mercadoría a clientes habituais dos produtos xenuínos, que descoñecían que se trataba de falsificacións.

Desta forma, a mercadoría chegaba ao consumidor final, que a adquiría en establecementos do ramo sen advertir que se trataba de produtos falsificados, toda vez que o seu aspecto exterior era idéntica ao do produto xenuíno desta marca vendida no circuíto regular.

Risco para o consumidor e competencia desleal

A actividade ilícita de organizacións criminais como a investigada na presente operación prexudica ao mercando interno da UE, tanto a nivel dos fabricantes legais titulares das marcas xenuínas, pola competencia desleal e a perdida de cifra de negocio que implica a distribución a consumo de produtos falsificados das súas marcas, como tamén aos consumidores, que pagan prezos que non se corresponden coa calidade real dos produtos ao ser estes falsificados.

Das presentes actuacións fixose cargo o Xulgado de Instrución 6 de Alacant. As investigacións continúan e non se descarta que se produzan novas detencións no ámbito internacional.