Operación da Axencia Tributaria, Garda Civil e Policía Nacional

• Detidos os catro tripulantes, de nacionalidade colombiana, que foron rescatados despois de que afundisen o artefacto ante o achegamento do buque ‘Fulmar’ do servizo de Vixilancia Aduaneira da Axencia Tributaria a 280 millas ao oeste da costa de Cádiz

• Os investigadores apuntan que a nave presenta características similares a outras ‘narcoembarcacións’ localizadas en operacións anteriores, e polo lugar da intervención e o xeito de actuar da tripulación, presúmese que transportaban cocaína a bordo

• Nunha operación paralela interviñéronse 900 quilos de cocaína a 200 millas das Canarias, coa colaboración internacional da NCA británica e a DEA dos EUA

26 de xuño de 2024.- Funcionarios do Servizo de Vixilancia Aduaneira da Axencia Tributaria, nunha operación conxunta con Policía Nacional e Garda Civil, levaron a cabo a interceptación dun semimergullable que se dirixía ás costas da Península. A operación, levada a cabo polo buque ‘Fulmar’ de Vixilancia Aduaneira, concluíu coa detención dos catro tripulantes do artefacto, de nacionalidade colombiana, que foron rescatados tras afundir a embarcación a 280 millas ao oeste da costa de Cádiz, ante o achegamento do "Fulmar". 

Os investigadores apuntan que a nave presenta unhas características similares ás doutras ‘narcoembarcacións’ localizadas en operacións anteriores, e polo lugar da intervención, así como o xeito de actuar da tripulación detida, presúmese que transportaba cocaína a bordo.

O operativo iníciase o pasado día 24, cando se recibe información da Drug Enforcement Administration (DEA) dos EUA, que indica un posible punto de transbordo entre un obxectivo descoñecido e unha embarcación presumiblemente semiríxida nunha zona onde o Servizo de Vixilancia Aduaneira xa mantiña vixilancia intensificada mediante medios satelitais e cara a onde xa estaba navegando o ‘Fulmar’ para optimizar a travesía de regreso a porto.

Na mañá do día 25, a unhas 280 millas ao oeste de Cádiz, o Buque de Operacións Especiais localiza pola súa proa un semimergullable de 20 metros de eslora, similar aos xa localizados na ría de Aldán en 2019 e na ría de Arousa en 2023.

A tripulación do artefacto, no momento en que perciben a proximidade do buque, abren as billas de fondo e saen á superficie para pórse a salvo. O semimergullable inúndase en minutos e afúndese coa súa carga ao fondo do mar. Os catro tripulantes colombianos son rescatados e detidos pola tripulación do "Fulmar".

Operación previa con 900 quilos de cocaína incautada

Dáse a circunstancia de que o buque de Vixilancia Aduaneira xa ía cargado con droga incautada, preto de 900 quilos de cocaína, no momento da intervención do semimergullable, xa que acababa de realizar, tres días antes, outra actuación igualmente conxunta con Garda Civil e Policía Nacional.

Neste primeiro operativo, e froito da colaboración internacional, recíbese intelixencia dos servizos da National Crime Agency (NCA) británica e a DEA, canalizada a través do Centro de Análise contra o Narcotráfico Marítimo no Atlántico (MAOC) e do Centro de Intelixencia contra o Terrorismo e o Crime Organizado (CITCO).

Como resultado da análise da intelixencia recibida, realizado polos servizos policiais e aduaneiros españois, activouse o ‘Fulmar’ para tratar de localizar e intervir unha embarcación que presumiblemente transportaba unha importante cantidade de cocaína con destino a España. A tripulación do ‘Fulmar’, na madrugada do sábado 22, localiza na zona estimada de transbordo a semiríxida, que ao verse descuberta inicia a fuxida, cargada cunha importante cantidade de fardos dos utilizados habitualmente para o tráfico de cocaína.

A persecución, en condicións meteorolóxicas complicadas, prolóngase durante máis de seis horas, e finalmente lógrase frustrar o intento de alixo. A tripulación da ‘narcolancha’ guinda a carga, un total de 30 fardos con preto de 900 quilos de cocaína, que son recuperados polos funcionarios do SVA .

A persecución cesou no momento en que, constatado que o total da mercadoría fora guindada ao mar, o obxectivo perseguido puxo rumbo á illa da Palma. Dáse a circunstancia de que ao día seguinte apareceu unha lancha abandonada na praia de Tazacorte na Palma que, case con toda seguridade, correspondía á que fuxiu despois de ser perseguida polo Buque de Operacións Especiais.

Todos estes feitos foron postos en coñecemento da Fiscalía Antidroga da Audiencia Nacional, que remitiu ao Xulgado de Garda as actuacións para continuar as investigacións, tomar declaración aos tripulantes do semimergullable e tratar de identificar aos da semiríxida.

O éxito deste tipo de actuacións é froito do excelente traballo de colaboración entre varios organismos europeos e nacionais (MAOC, CITCO) e os diferentes corpos policiais e aduaneiros españois, así como, neste caso, da cooperación da DEA e a NCA.

 

 

Filmación do operativo (para descargar o vídeo débese introducir o seguinte enderezo web):   https://we.tl/t-W3tFoCFc9U