Saltar ao contido principal

Desarticulado un grupo delituoso internacional dedicado ao contrabando de tabaco que contaba con dúas fábricas clandestinas en Sevilla

Operación conxunta da Axencia Tributaria, Policía Nacional e Policía Portuguesa apoiada por Europol

  • Un total de 18 persoas foron detidas en España e cinco en Portugal pola súa presunta implicación na distribución e venda do produto a nivel nacional e internacional
  • No marco das actuacións interviñéronse dez toneladas de picadura de tabaco e máis de 36.000 caixetiñas
  • A organización posuía dúas naves clandestinas nas localidades de Montellano e Lebrija, onde levaban a cabo a actividade ilegal manipulando e almacenando o tabaco para a obtención dun gran beneficio económico

3 de setembro de 2021.- A Axencia Tributaria, nunha operación conxunta coa Policía Nacional e a Policía Portuguesa co apoio de Europol, desarticulou unha organización criminal internacional dedicada ao contrabando de tabaco, tanto na modalidade de caixetiñas, coma de picadura.No marco da operación, denominada ‘Tronco’, foron detidos 18 persoas en España e cinco en Portugal e interviñéronse no territorio nacional máis de dez toneladas de picadura de tabaco e máis de 36.000 caixetiñas.

Desmanteláronse, á súa vez, as dúas fábricas clandestinas onde se centralizaba a actividade ilegal, ambas as dúas na provincia de Sevilla, nas localidades de Montellano e Lebrija.

A investigación comezou no mes de xaneiro, a raíz dunha Orde Europea de Investigación procedente da GNR de Portugal, liderando o operativo en España Vixilancia Aduaneira da Axencia Tributaria e o Grupo III da Unidade de Drogas e Crime Organizado (UDYCO) de Policía Nacional en Sevilla, con e o apoio de Europol.

Avanzadas as xestións, os investigadores lograron identificar unha persoa afincada en Sevilla e coñecer o grao de participación dentro deste grupo criminal, sendo o encargado de transportar o tabaco ilegal ata Portugal, para distribuílo por distintos locais de ocio e restauración.

Esta liña de investigación permitiu a identificación e localización dos provedores, almacéns e fábricas clandestinas, levando aos axentes ata as provincias de Sevilla, Córdoba, Málaga, Cádiz e Badaxoz.

Máis de dez toneladas de folla de tabaco intervido

A partir dese momento intensificáronse as vixilancias nas naves onde se podía almacenar o tabaco e as fábricas clandestinas, sendo o pasado mes de xullo cando se elaborou un amplo dispositivo formado por máis de 200 efectivos policiais dos diferentes corpos para realizar máis de 12 rexistros simultáneos en Sevilla, Córdoba e Badaxoz.

No operativo practicáronse máis de 18 detencións, interviñéronse varios vehículos de alta gama e armas de fogo e máis de dez toneladas de picadura de tabaco, así como máis de 36.000 caixetiñas, o que tería alcanzado no mercado un valor de máis dun millón de euros.

En Portugal realizáronse máis de 60 rexistros, cun resultado de cinco persoas detidas e 440 quilos de picadura de tabaco, desarticuláronse tres fábricas destinadas á fabricación de tabaco e incautáronse dúas armas de fogo e máis de 220.000 euros en efectivo.

Filmación do operativo (para descargar o vídeo e as fotografías débese introducir a seguinte dirección web):

https://we.tl/t-u7AUrHIzAt