Berrikusteko prozedura bereziak

Diru-bilketa egintzetako akatsen zuzenketa: Edozein unetan, ofizioz edo interesdunak eskatuta, egintza eman duen organoak bertan atzemandako errakuntza materialak, egitezkoak edo aritmetikoak zuzentzeko prozedura da, betiere preskripzio-epea igaro ez bada.

Ezeztatzea: Berrikuspen-prozedura berezia, zeinaren bidez zerga-administrazioak bere egintzak ezezta baititzake interesdunen mesedetan, honako hiru kasu hauetan:

1. Legea nabarmen hausten dutela uste denean.
2. Egoera juridiko jakin bati eragiten dioten gerora sortutako zirkunstantziek agerian uzten dutenean emandako egintza bidegabea dela.
3. Prozedura izapidetzean interesdunen defentsa-gabezia gertatu denean.    

Zerga-bilketako zuzenbideko erabat deusezak diren egintzak berrikustea: Administrazio-bidea amaitzen duten edo epearen barruan errekurritzen ez diren zerga-arloko egintzen deuseztasuna deklaratzeko prozedura, honako kasu hauetan:

1. Konstituzioak babesten dituen eskubide eta askatasunei erasaten dietenean.
2. Gaia edo lurraldea dela-eta argi eta garbi eskumenik ez duten organoek eman badituzte.
3. Ezinezko edukia badute.
4. Arau-hauste penalak badira edo horren ondorioz emandakoak badira.
5. Legez ezarritako prozedura edo kide anitzeko organoetan borondatea eratzeko funtsezko arauak erabat alde batera utzita ematen badira.
6. Ordenamendu juridikoaren aurkako egintza adieraziak edo presuntziozkoak direnean, horien bidez ahalmen edo eskubideak eskuratzen direnean, horiek eskuratzeko funtsezko betekizunak bete gabe.
7. Lege-mailako xedapen batean berariaz ezarritako beste batzuk.

Zerga-bilketako egintza deuseztagarrien kaltegarritasun-deklarazioa: Prozedura horren bidez, zerga-administrazioak interes publikorako kaltegarritzat jo ahal izango ditu ordenamendu juridikoa hausten duten interesdunen aldeko egintzak eta ebazpenak, ondoren administrazioarekiko auzien bidean aurkaratzeko.