Apartamentu turistikoen alokairuaren tributazioa

Zergak nola ordaindu

Etxebizitzaz bestelako erabilerarako errentamendutzat hartzen da, eraikin baten gainean egindako errentamendua, baldin eta errentamenduaren helburu nagusia errentariaren etxebizitza-behar iraunkorra asetzea ez bada; apartamentu turistikoen errentamenduen kasua da.

Apartamentu turistiko bat alokatzen duzunean, zerbitzu osagarri batzuk eskain ditzakezu.

Ematen dituzun zerbitzuak hotel-industriari badagozkio, alokairuaren bidez lortzen dituzun etekinak jarduera ekonomikoen etekinak dira.

Zerbitzu horiek, besteak beste, honako hauek lirateke:

• bezeroari harrera eta etengabeko arreta ematea, horretarako prestatutako gune batean

• higiezinaren eta ostatuaren aldizkako garbiketa

• oheko eta komuneko arropa aldizka aldatzea

• beste zerbitzu batzuk (ikuztegia, maletak zaintzea, prentsa, erreserbak, etab.) bezeroaren eskura jartzea.

• eta, batzuetan, elikadura eta jatetxe zerbitzuen eskaintza

Aitzitik, ez dira hotel-industriaren berezko zerbitzu osagarritzat hartzen, eta, beraz, alokairu turistikoa egiten duzu honako zerbitzu hauek ematen dituzunean:

• apartamentua garbitzea errentari bakoitzak kontratatutako aldian sartzean eta irtetean

• apartamentuan arropa aldatzea errentari bakoitzak kontratatutako aldian sartzean eta irtetean

• Eraikineko eremu komunen (ataria, eskailerak eta igogailuak) eta kokatuta dagoen urbanizazioaren (berdeguneak, sarbide-ateak, espaloiak eta kaleak) garbiketa

• iturgintza, elektrizitatea, beirateria, pertsianak, sarrailagintza eta etxetresna elektrikoak konpontzeko laguntza teknikoko eta mantentze-lanetako zerbitzuak

Turismo-alokairuaren etekinak, oro har, kapital higiezinaren etekinak dira.

Hala ere, jarduera garatzeko gutxienez lan-kontratu eta lanaldi osoko langile bat badaukazu, alokairu turistikoaren bidez lortzen dituzun errendimenduak jarduera ekonomikoen errendimenduak dira.