4.2.71 Claves 00323 e 00324 empresas de reducida dimensión perdas por deterioración créditos insolvencias (Art. 104 LIS)

Segundo o que se dispón no artigo 104 da LIS, no período impositivo en que se cumpran as condicións do artigo 101 da LIS , as entidades poderán deducir a perda por deterioración dos créditos para a cobertura do risco derivado das posibles insolvencias ata o límite do 1 por cento sobre os debedores existentes á conclusión do período impositivo.

Para estes efectos:

• Entre os referidos debedores non se incluirán os debedores sobre os que se recoñecese a perda por deterioración dos créditos por insolvencias establecidas no artigo 13.1 da LIS e aqueloutros cuxas perdas por deterioración non teñan o carácter de deducibles segundo o que se dispón neste último artigo.

• O saldo da perda por deterioración efectuada segundo o indicado non poderá exceder do referido límite.

Nos períodos impositivos en que deixen de cumprir as condicións do artigo 101 da LIS , as perdas efectuadas nestes períodos impositivos, por deterioración dos créditos para a cobertura do risco derivado das posibles insolvencias dos debedores, non serán deducibles ata o importe do saldo da perda por deterioración referida no parágrafo primeiro deste apartado.

De acordo co exposto, as entidades que cumpran as condicións do artigo 101 da LIS deberán incluír na clave [00323] (aumentos) o importe do exceso das perdas por deterioración contabilizada sobre as fiscalmente deducibles no período impositivo obxecto de declaración. E no suposto de reversión das perdas por deterioración, na contía que fosen obxecto de corrección fiscal de aumento en períodos impositivos anteriores, deberán incluíras na clave [00324] (diminucións) no período impositivo de reversión.