1.6.1 Declaración a ingresar sen domiciliación bancaria

Se o resultado da declaración é a ingresar e o pagamento non se realiza mediante domici­liación bancaria, o contribuínte ou se é o caso, o presentador deberá pórse en contacto coa Entidade colaboradora, xa sexa por vía electrónica (directa ou a través da Sede electrónica da Axencia Tributaria) ou acudindo ás súas sucursais para realizar o pagamento da cota resultante.

Unha vez realizado o ingreso, a Entidade colaboradora proporcionará ao obrigado tributario ou ao presentador o recibo-xustificante de pagamento a que se refire o apartado 3 do artigo 3 da Orde EHA/2027/2007, do 28 de xuño, en que deberá figurar o Número de Referencia Completo (NRC) asignado pola entidade colaboradora ao ingreso realizado.

Na mesma data en que se realizase o ingreso, o contribuínte ou, se é o caso, o presentador conectará coa Sede electrónica da Axencia Tributaria e procederá a:

• Seleccionar o concepto fiscal e o tipo de declaración a transmitir.

• Consignar o Número de Referencia Completo (NRC) asociado ao ingreso (agás nos casos en que non teña que ingresar a débeda por pertencer a un grupo fiscal).

• Seleccionar o certificado electrónico recoñecido e xerar a sinatura electrónica para poder transmitir á Axencia Tributaria a declaración.

Nos casos en que o presentador sexa colaborador social debidamente autorizado, deberá transmitir a declaración usando o seu propio certificado electrónico recoñecido.

Se a declaración é aceptada, a Axencia Tributaria devolveralle en pantalla os datos da declaración con resultado a ingresar validados cun código seguro de verificación de 16 caracteres, ademais da data e hora da presentación. O contribuínte ou presentador deberá conservar a declaración aceptada (modelo 200), así como o documento de ingreso (modelo 206) debidamente validados co correspondente código seguro de verificación.

Se a presentación fose rexeitada, mostrarase en pantalla a descrición dos erros detectados para que se proceda á súa emenda.

Nos casos en que existan dificultades técnicas que impidan efectuar a transmisión elec­trónica na mesma data do ingreso, esta poderá realizarse ata o cuarto día natural seguinte ao do ingreso, sen que iso supoña unha alteración dos prazos de declaración e ingreso previsto regulamentariamente.