11.9 Contribuíntes polo imposto sobre a renda de non residentes (establecementos permanentes)
Na regulación actual da tributación das rendas obtidas en España polos contribuíntes do Imposto da Renda de non Residentes mediante establecemento permanente, contida no texto refundido da Lei do Imposto sobre a Renda de non Residentes (LIRNR), aprobado polo RDLeg. 5/2004, do 5 de marzo, a remisión á Lei do Imposto sobre Sociedades é constante, polo que se considerou conveniente que os citados contribuíntes utilicen os mesmos modelos de declaración que os contribuíntes do Imposto sobre Sociedades.
Por outra banda, de acordo coa vixente regulación do réxime de atribución de rendas, as entidades en réxime de atribución de rendas constituídas no estranxeiro con presenza en territorio español, é dicir, as que desenvolvan no devandito territorio unha actividade económica, teñen o carácter de contribuíntes do Imposto sobre a Renda de non Residentes, constituíndo a base impoñible a parte de renda obtida en territorio español que resulte atribuíble aos membros non residentes da entidade.