Confirmación e presentación do borrador de declaración

Cando o contribuínte considere que o borrador da declaración reflicte a súa situación tributaria para os efectos deste imposto poderá confirmaro e presentaro tendo o mesmo, neste caso, a consideración de declaración do IRPF a todos os efectos.

A confirmación e presentación do borrador de declaración, e a realización do ingreso, a solicitude da devolución ou a renuncia á mesma, efectuaranse por algún dos seguintes medios:

1. Por medios electrónicos a través de Internet na Sede electrónica da Axencia

Neste caso, o contribuínte deberá facer uso dalgún dos sistemas de identificación seguinte: certificado electrónico recoñecido, sistema Cl@ve PIN ou número de referencia. Tratandose de declaracións conxuntas formuladas por ambos os dous cónxuxes cumprirá, ademais, comunicar o NIF, así como o número de referencia ou Cl@ve PIN do cónxuxe.

O procedemento que hai que seguir será o seguinte:

a) O declarante deberá conectarse coa Sede electrónica da Axencia Estatal de Administración Tributaria en Internet, no enderezo electrónico https://sede.agenciatributaria.gob.es, accedendo ao Servizo de tramitación do borrador/declaración. A continuación, segundo cal sexa o resultado de borrador de declaración, o contribuínte deberá:

Se o resultado do borrador da declaración é a ingresar e non opta pola domiciliación bancaria en entidade colaboradora como medio de pagamento do importe resultante ou, se é o caso, do correspondente ao primeiro prazo, o declarante cubrirá ou confirmará, se é o caso, as opcións de fraccionamento do pagamento e domiciliación do segundo prazo, consignará o Número de Referencia Completo (NRC) obtido tras efectuar o ingreso na entidade colaboradora e procederá á confirmación e presentación do borrador.

Con esta finalidade, o contribuínte poderá obter o Número de Referencia Completo (NRC) da entidade colaboradora por algunha das seguintes vías:
- De forma directa, ben nas súas oficinas ou ben a través dos servizos de banca electrónica que aquelas presten aos seus clientes.
- A través da Sede electrónica da Axencia Estatal de Administración Tributaria, por vía electrónica, utilizando un certificado electrónico recoñecido ou mediante a utilización do sistema Cl@ve PIN).
Neste caso, o contribuínte tamén poderá efectuar o pagamento a través dun documento para o ingreso en entidade colaboradora, que deberá imprimir e proceder a efectuar o devandito ingreso.
Se o resultado do borrador da declaración é a ingresar e o contribuínte opta pola domiciliación bancaria en entidade colaboradora como medio de pagamento do importe resultante ou, se é o caso, do correspondente ao primeiro prazo, deberá cubrir ou confirmar o identificador único da conta, Código Internacional de Conta Bancaria (IBAN) e, se é o caso, as opcións de fraccionamento do pagamento e a domiciliación bancaria e procederá á confirmación e presentación do borrador.
Se o resultado do borrador da declaración é un resultado a devolver ou negativo o declarante deberá, se é o caso, cubrir ou confirmar o identificador único da conta, Código Internacional de Conta Bancaria (IBAN) e proceder á súa confirmación e presentación.

b) Se a declaración é aceptada, a Axencia Estatal de Administración Tributaria devolveráen pantalla os datos do modelo de declaración do IRPF correspondente á declaración presentada, xustificante de presentación, validado cun código seguro de verificación en que constará a data e hora de presentación que o declarante deberá imprimir ou arquivar e conservar.

Os contribuíntes tamén poden acceder aos seus datos fiscais e ao resumo do borrador dedeclaración a través dunha aplicación para dispositivos móbiles, previo rexistro na mesma, utilizando algún dos seguintes sistemas de identificación establecida no apartado anterior (sistema Cl@ve PIN ou número de referencia). Tamén poderán confirmar e presentar o borrador de declaración sempre que non teñan que modificar ou incluír algún dato adicional.

2. Por medios electrónicos a través do teléfono

Mediante chamada ao número 901 200 345 (accesible tamén a través do teléfono 91 535 68 13). Para tal fin, o contribuínte deberá comunicar, entre outros datos, o seu Número de Identificación Fiscal (NIF), o seu número de referencia, así como o Código Internacional de Conta Bancaria (IBAN), en que desexe efectuar a citada domiciliación. En caso de declaración conxunta formulada por ambos os dous cónxuxes cumprirá, ademais, comunicar o NIF, así como o número de referencia do cónxuxe.

Realizada a presentación, a Axencia Estatal de Administración Tributaria devolverá o código seguro de verificación asociada á presentación.

Con esta finalidade, pola Axencia Estatal de Administración Tributaria adoptaranse as medidas de control precisas que permitan garantir a identidade dos contribuíntes que efectúan a comunicación, confirmación e presentación do borrador de declaración.

O contribuínte pode obter o xustificante da súa presentación accedendo á Sede electrónica da Axencia Estatal de Administración Tributaria en Internet, no enderezo electrónico https://sede.agenciatributaria.gob.es, mediante o uso dalgún dos sistemas de identificación seguinte: certificado electrónico recoñecido, número de referencia ou sistema Cl@ve PIN, ou ben mediante o servizo de cotexo de documentos electrónicos da Sede Electrónica co código seguro de verificación que lle comunicará o operador telefónico.

A vía telefónica non poderá utilizarse para confirmar o borrador da declaración e levar a cabo a súa presentación cando o resultado do mesmo sexa a ingresar e o contribuínte non opte pola domiciliación bancaria en entidade colaboradora do importe resultante ou, se é o caso, do correspondente ao primeiro prazo.

Nota: teñase en conta a Resolución do 15 de decembro de 2020, do Departamento de Xestión Tributaria da Axencia Estatal de Administración Tributaria, pola que se habilitan trámites e actuacións a través da canle telefónica, mediante determinados sistemas de identificación.

3. Persoalmente

A confirmación e presentación borrador de declaración poderá facerse:

a) O contribuínte poderá comparecerse nas oficinas da Axencia Estatal de Administración Tributaria, previa solicitude de cita, así como nas habilitadas polas Comunidades Autónomas, Cidades con Estatuto de Autonomía e Entidades locais##3## para a confirmación do borrador de declaración e a súa inmediata transmisión electrónica.

Agora ben, non poderá confirmarse o borrador de declaración e levar a cabo a súa presentación por esta vía cando o resultado do mesmo sexa a ingresar e o contribuínte non opte pola domiciliación bancaria en entidade colaboradora do importe resultante ou, se é o caso, do correspondente ao primeiro prazo.

Tamén poderán presentarse deste xeito as declaracións do IRPF de cónxuxes non separados legalmente en que un deles solicite a suspensión do ingreso e o outro manifeste a renuncia ao cobramento da devolución, calquera que sexa o resultado final das súas declaracións, a ingresar, a devolver ou negativo.

Neste caso entregarase ao contribuínte o seu exemplar do “Modelo 100. Documento de ingreso ou devolución da declaración do Imposto sobre a Renda das Persoas Físicas” como xustificante da presentación realizada ou, se é o caso, o xustificante de presentación cos datos do Modelo de declaración do IRPF correspondente á declaración presentada, validado cun código seguro de verificación de 16 caracteres en que constará a data e hora da presentación da declaración.

b) Nas oficinas das Administracións tributarias das Comunidades Autónomas e Cidades con Estatuto de Autonomía que subscribisen coa Axencia Estatal de Administración Tributaria un convenio de colaboración para a implantación de sistemas de portelo único tributario, nos termos previstos no devandito convenio.