Outras modalidades de ingreso (só para pagamentos non fraccionados)

1. Pagamento presencial en oficina bancaria con documento de ingreso

Ao seleccionar a devandita forma de ingreso, o contribuínte efectuará a presentación da súa declaración a través da Sede electrónica da AEAT e deberá acudir  a unha entidade colaboradora para efectuar o pagamento a través do documento de ingreso.

Se a declaración é aceptada, a Axencia Estatal da Administración Tributaria devolverá en pantalla os datos do modelo de declaración do IRPF correspondente á declaración presentada, xustificante de presentación, validado cun código seguro de verificación en que constará a data e hora de presentación que o declarante deberá imprimir ou arquivar e conservar.

No suposto de que a autoliquidación fose rexeitada, mostraranse os erros detectados para que se proceda á súa emenda.

2. Recoñecemento de débeda (total ou parcial) con solicitude de adiamento

Esta opción de pagamento da débeda só está dispoñible por Internet e para os supostos en que o contribuínte non desexe fraccionar o pagamento da mesma.

Este procedemento ten a particularidade de que, unha vez finalizada a presentación da declaración, recoñecerase unha débeda polo importe total ou parcial da declaración, e o declarante ou a persoa autorizada presentar por vía electrónica declaracións en representación de terceiras persoas obterá, ademais do código seguro de verificación, unha clave de liquidación de dezasete caracteres da débeda que deberá utilizar para facer efectiva a devandita solicitude a través da ligazón habilitada para ese fin.

A devandita solicitude de adiamento poderá realizara no momento da presentación da declaración ou ben nun momento posterior na Sede electrónica da Axencia Estatal da Administración Tributaria a través de Internet, no enderezo electrónico https://sede.agenciatributaria.gob.es, a través da opción ”Pagar, aprazar e consultar”, do apartado de Información e xestións.

3. Recoñecemento de débeda (total ou parcial) con solicitude de compensación

Do mesmo xeito que no caso anterior, esta opción de pagamento só está dispoñible por Internet e para os supostos en que o contribuínte non desexe fraccionar o pagamento da débeda.

Do mesmo xeito, no momento da presentación electrónica da declaración recoñecerase unha débeda polo importe total ou parcial da declaración manifestando a intención de solicitar unha compensación do pagamento, coa especialidade sinalada no caso anterior, isto é que, unha vez finalizada a presentación da declaración, o declarante ou a persoa autorizada presentar por vía electrónica declaracións en representación de terceiras persoas obterá, ademais do código seguro de verificación, unha clave de liquidación de dezasete caracteres da débeda que deberá utilizar para facer efectiva a devandita solicitude a través da ligazón habilitada para ese fin.

A devandita solicitude de compensación poderá realizara no momento da presentación da declaración ou ben nun momento posterior na Sede electrónica da Axencia Estatal da Administración Tributaria a través de Internet, no enderezo electrónico https://sede.agenciatributaria.gob.es, a través da opción ”Pagar, aprazar e consultar”, do apartado de Información e xestións.

4. Recoñecemento de débeda (total ou parcial) con pagamento mediante entrega de bens integrantes do Patrimonio Histórico Español

Normativa: Arts. 97.3 Lei IRPF e 62.3 Regulamento IRPF

O pagamento da débeda tributaria poderá realizarse mediante entrega de bens integrantes do Patrimonio Histórico Español que estean inscritos no Inventario Xeral de Bens Mobles ou no Rexistro Xeral de Bens de Interese Cultural, de acordo co que se dispón no artigo 73 da Lei 16/1985, do 25 de xuño, do Patrimonio Histórico Español.

O contribuínte que pretenda utilizar este medio de pagamento en especie como medio para satisfacer débedas polo IRPF á Administración deberá seguir o procedemento establecido para ese fin polo artigo 40 do   Regulamento Xeral de Recadación, aprobado polo Real decreto 939/2005, do 29 de xullo (BOE do 2 de setembro). O procedemento para a presentación electrónica de autoliquidacións con resultado a ingresar con solicitude de pagamento mediante entrega de bens do Patrimonio Histórico Español regúlase no artigo 10 da Orde HAP/2194/2013, do 22 de novembro, pola que se regulan os procedementos e as condicións xerais para a presentación de determinadas autoliquidacións, declaracións informativas, declaracións censuais, comunicacións e solicitudes de devolución, de natureza tributaria.

Importante: en ningún caso, a presentación electrónica da declaración do IRPF terá, por si mesma, a consideración de solicitude de compensación, adiamento ou fraccionamento de débeda ou de solicitude de pagamento mediante a entrega de bens do Patrimonio Histórico Español.

 5. Recoñecemento de débeda, e pagamento mediante transferencia bancaria

O contribuínte que non dispoña dunha conta aberta nalgunha das entidades de crédito que actuen como colaboradoras na xestión recadadora pode realizar o pagamento da totalidade da débeda tributaria resultante da declaración do IRPF, previo recoñecemento da mesma, mediante transferencia bancaria, de acordo co que se dispón na Resolución do 18 de xaneiro de 2021, da Dirección Xeral da Axencia Estatal de Administración Tributaria, pola que se definen o procedemento e as condicións para o pagamento de débedas mediante transferencias a través de entidades colaboradoras na xestión recadadora encomendada á Axencia Estatal de Administración Tributaria.

No caso de que se detecte que a transferencia foi efectuada desde unha conta aberta nunha entidade colaboradora da AEAT, a devandita transferencia será devolta á súa conta de orixe e o pagamento realizado non producirá ningún efecto, coas consecuencias legais que iso puidese supor sobre a débeda liquidada/autoliquidada. Neste caso, debe elixir outra modalidade de pagamento.

Pódese consultar máis información sobre este procedemento de pagamento por transferencia na Sede electrónica da AEAT. 

Así mesmo, como se avanzou, nos casos en que non dispoña de conta aberta en ningunha entidade de crédito que actúe como colaboradora na xestión recadadora, poderá efectuar o pagamento mediante domiciliación nunha conta aberta nunha entidade non colaboradora da Zona Única de Pagamentos en Euros (Zona SEPA) nos termos previstos na Orde EHA/1658/2009, do 12 de xuño. 

6. Ingreso parcial con recoñecemento de débeda por imposibilidade de pagamento

O contribuínte que non desexe fraccionar o pagamento da débeda, poderá realizar o ingreso de parte do seu importe e solicitar o recoñecemento de débeda con imposibilidade de pagamento da contía restante.

Para iso, deberá indicar por un lado o importe que desexa pagar, achegando o Número de Referencia Completo (NRC) correspondente ao devandito importe, fornecido pola súa oficina bancaria ou obtido mediante calquera das formas de pagamento electrónico de impostos con entidades colaboradoras que se expuxeron con anterioridade e, por outro, o importe polo que desexa recoñecer débeda.

Deste xeito, no momento presentación electrónica da declaración recoñecerase unha débeda polo importe pendente de pagamento, e o declarante ou presentador obterá unha clave de liquidación da débeda de dezasete caracteres coa que poderá solicitar co adiamento ou compensación do importe anterior, nese mesmo momento ou con posterioridade a través da Sede electrónica da Axencia Estatal da Administración Tributaria a través da opción ”Pagar, aprazar e consultar”, do apartado de Información e xestións.