Exemplos de contribuíntes obrigados a declarar

A título de exemplo, están obrigados a declarar, entre outros, os seguintes contribuíntes:

• Os contribuíntes que percibisen rendementos íntegros do traballo procedente dun mesmo pago por un importe superior a 22.000 euros anuais.

• Os contribuíntes que percibisen durante 2023 rendementos íntegros do traballo por un importe superior a 15.000 euros nos seguintes supostos:

  1. Cando procedan de máis dun pagador, se a suma das cantidades procedentes do segundo e restantes pagadores, por orde de contía, supera a cifra de 1.500 euros anuais.

  2. Cando se trate de pensionistas con varias pensións cuxas retencións non se practicasen de acordo coas determinadas pola Axencia Tributaria, previa solicitude do contribuínte para ese fin, por medio do modelo 146.

  3. Cando se perciban pensións compensatorias do cónxuxe ou anualidades por alimentos non exentas.

  4. Cando o pagador dos rendementos do traballo non estea obrigado a reter.

  5. Cando se perciban rendementos íntegros do traballo suxeitos a tipo fixo de retención.

• Os contribuíntes que fosen titulares de bens inmobles de uso propio distinto da vivenda habitual e do solo non edificado, cuxas rendas imputadas canda os rendementos derivados de Letras do Tesouro e o importe das subvencións para a adquisición de vivenda de protección oficial ou de prezo taxado e demais ganancias patrimoniais derivadas de axudas públicas sexa superior a 1.000 euros anuais.

• Os contribuíntes titulares de actividades económicas, incluídas as agrícolas e gandeiras, sexa cal for o método de determinación do rendemento neto das mesmas, sempre que os rendementos íntegros canda os do traballo e do capital, así como o das ganancias patrimoniais sexa superior a 1.000 euros anuais.

• Os contribuíntes que obtivesen perdas patrimoniais en contía igual ou superior a 500 euros anuais.

• Os contribuíntes titulares de inmobles arrendados (pisos, locais, prazas de garaxe), cuxos rendementos totais, exclusivamente procedentes dos citados inmobles, ou conxuntamente cos rendementos do traballo, do capital mobiliario, de actividades económicas e ganancias patrimoniais excedan de 1.000 euros anuais.

• Os contribuíntes que, a partir do 1 de xaneiro de 2023, en calquera momento do período impositivo, estivesen de alta, como traballadores por conta propia, no Réxime Especial de Traballadores por Conta Propia ou Autónoma, ou no Réxime Especial da Seguridade Social dos Traballadores do Mar.