Transmisión de dereitos de subscrición

Importante : equipásese desde o 1 de xaneiro de 2017 o tratamento fiscal derivado da transmisión de dereitos de subscrición, tanto se se trata de dereitos procedentes de valores admitidos a negociación como non admitidos a negociación. En ambos os dous casos, a transmisión dos dereitos de subscrición tributará como ganancia patrimonial no exercicio en que se produza.

Os dereitos de subscrición preferente son dereitos que outorgan ao socio fronte a terceiros a preferencia para subscribir novas accións ou participacións, en proporción ao valor nominal das accións ou participacións que posúan no momento de realizarse pola sociedade unha ampliación de capital social ou na emisión de obrigas convertibles en accións.

A partir do 1 de xaneiro de 2017, o importe obtido pola transmisión de dereitos de subscrición derivada de valores admitidos a negociación que correspondan ao contribuínte pola súa condición de socio ou partícipe no capital da entidade ten a consideración de ganancia patrimonial para o transmitente no período impositivo en que se produza a citada transmisión.

Na transmisión destes dereitos de subscrición, estará obrigado a reter ou ingresar a conta polo IRPF, a entidade depositaria e, no seu defecto, o intermediario financeiro ou o fedatario público que interviñese na transmisión. A retención que hai que practicar sobre as ganancias patrimoniais derivadas da transmisión de dereitos de subscrición é o 19 por 100 sobre o importe obtido na operación ou, no caso de que o obrigado a practicara sexa a entidade depositaria, sobre o importe recibido por esta para a súa entrega ao contribuínte.

Réxime transitorio: ata o 31 de decembro de 2016, o importe obtido na transmisión de dereitos de subscrición non se consideraba ganancia patrimonial para o transmitente senón que minoraba o valor de adquisición das accións de que procedía para os efectos de futuras transmisións. Como consecuencia desta modificación, estableceuse un réxime transitorio que permite aos contribuíntes determinar o valor de adquisición dos valores admitidos a negociación deducindo o importe obtido polas transmisións de dereitos de subscrición realizada ata o 31 de decembro de 2016, con excepción do importe de tales dereitos que tributase como ganancia patrimonial.