Saltar ao contido principal
Manual práctico de Renda 2023.

6.2 Límites e exceso de achegas

A. Achegas anuais máximas a sistemas de previsión social que poden dar dereito a reducir a base impoñible

Normativa: Art. 51.6 e disposición adicional décimo sexta Lei  IRPF

  • Achegas anuais máximas (agás para seguros colectivos de dependencia)

    A partir do 1 de xaneiro de 2023, o conxunto das achegas anuais máximas realizadas no exercicio aos sistemas de previsión social, incluíndo, se é o caso, as que fosen imputadas polos promotores, que poden dar dereito a reducir a base impoñible xeral non poderá exceder das seguintes cantidades:

    • Límite xeral:  1.500 euros anuais polo total de achegas e de contribucións empresariais.

      No devandito límite xeral teñen cabida as achegas do traballador tanto a sistemas individuais coma a sistemas de previsión social de emprego, sen necesidade neste último caso de estar condicionadas á realización de contribucións empresariais. 

    • Incremento do límite anterior:

      Hai que distinguir:

      1. Incremento por contribucións empresariais e achegas do traballador ao mesmo sistema de previsión social: 8.500 euros

        As achegas do traballador teñen que ser por importe igual ou inferior ás cantidades que resulten do seguinte cadro en función do rendemento íntegro que perciba o traballador do empregador que realice as contribucións e do importe anual da contribución empresarial:

        8.500 euros sempre que este incremento proceda de contribucións empresariais a sistemas de emprego ou de achegas do traballador ao mesmo sistema de emprego por importe igual ou inferior a tales contribucións empresariais.

        Rendementos íntegros de traballo do traballador (*) Importe anual da contribución empresarial (**) Achega máxima do traballador (***)
        Rendementos íntegros do traballo igual ou inferior a 60.000 euros Igual ou inferior a 500 euros. O resultado de multiplicar a contribución empresarial por 2,5.
        Entre 500,01 e 1.500 euros. 1.250 euros, máis o resultado de multiplicar por 0,25 a diferenza entre a contribución empresarial e 500 euros.
        Máis de 1.500 euros. O resultado de multiplicar a contribución empresarial por 1.
        Rendementos íntegros do traballo superior  a 60.000 euros Calquera importe O resultado de multiplicar a contribución empresarial por 1.

        Notas ao cadro :

        (*) Non hai que considerar os rendementos íntegros totais que perciba o traballador, senón os rendementos íntegros que procedan de cada empregador que efectúa a contribución.

        (**) Achegas a distintos sistemas de previsión social polo mesmo empregador : debe tomarse en consideración o importe das contribucións empresariais que efectúe cada empregador a cada un dos sistemas de previsión social de maneira individual, sen que proceda sumar as contribucións empresariais para estes fins.

        Achegas ao mesmo sistema de previsión social por distintos empregadores: teñen que tomarse en consideración as contribucións realizadas por cada un dos empregadores de maneira individual.

        (***) As achegas deben gardar relación coas contribucións efectuadas ao mesmo sistema de previsión social.

        As cantidades achegadas pola empresa que deriven dunha decisión do traballador terán a consideración de achegas do traballador.

        Atención: a empresa que realiza a contribución deberá comunicar á entidade xestora ou aseguradora do instrumento de previsión social, con respecto a cada un dos seus traballadores, que non concorre a circunstancia de que o traballador obteña no exercicio rendementos íntegros do traballo superior a 60.000 euros procedentes da empresa.

      2. Incremento por achegas propias de traballadores por conta propia / autónomos: 4.250 euros

        Debe tratarse dunha das seguintes achegas:

        • Achegas aos plans de pensións sectoriais previstos no artigo 67.1.a) do texto refundido da Lei de Regulación dos Plans e Fondos de Pensións, realizadas por traballadores por conta propia ou autónomos que se adhiran aos devanditos plans por razón da súa actividade.

          Son os Plans de pensións de emprego promovidos polas empresas incluídas nos acordos colectivos de carácter sectorial que instrumenten compromisos por pensións en favor das súas persoas traballadoras, con especial atención a promover a súa implantación nas pequenas e medianas empresas.

        • Achegas aos plans de pensións de emprego simplificado de traballadores por conta propia ou autónomos previstos no artigo 67.1.c) do texto refundido da Lei de Regulación dos Plans e Fondos de Pensións;

          Son os Plans de pensións de traballadores por conta propia ou autónomos, promovidos polas asociacións, federacións, confederacións ou unións de asociacións de traballadores por conta propia ou autónomos, por sindicatos, por colexios profesionais ou por mutualidades de previsión social, en que as súas persoas partícipes exclusivamente sexan persoas traballadoras por conta propia ou autónomos. Non se requirirá a condición previa de asociado ao partícipe que desexe adscribirse a un plan promovido por unha asociación de traballadores por conta propia ou autónomos.

        • Achegas propias que o empresario individual ou o profesional realice a plans de pensións de emprego, de que sexa promotor e, ademais, partícipe.

        • Achegas propias que o empresario individual ou o profesional realice a Mutualidades de Previsión Social de que sexa mutualista.

        • Achegas propias que o empresario individual ou o profesional realice a plans de previsión social empresarial ou seguros colectivos de dependencia de que, pola súa parte, sexa tomador e asegurado.

    Importante: en todo caso, a contía máxima de redución por aplicación dos incrementos previstos nos números 1.º e 2.º anteriores será de 8.500 euros anuais.

  • Achega anual máxima para seguros colectivos de dependencia

    Ademais, para as primas satisfeitas pola empresa en virtude de contratos de seguro colectivo de dependencia contratada por esta para cubrir compromisos por pensións e imputados ao traballador establécese un límite adicional, propio e independente dos anteriores, de 5.000 euros anuais.

    Estes límites aplicaranse individualmente a cada partícipe integrado na unidade familiar.

    Excepcionalmente, a empresa promotora poderá realizar achegas a un plan de pensións de emprego de que sexa promotor cando sexa preciso para garantir as prestacións en curso ou os dereitos dos partícipes de plans que inclúa réximes de prestación definida para a xubilación e puxésese de manifesto, a través das revisións actuariais, a existencia dun déficit no plan de pensións.

    Regra especial para os empresarios individuais: Aos efectos do cálculo deste límite as achegas propias que o empresario individual realice a seguros colectivos de dependencia de que, pola súa parte, sexa tomador e asegurado, consideraranse como contribucións empresariais.

B. Límite máximo conxunto de redución na base impoñible

Normativa: Art. 52.1 Lei IRPF

  1. En xeral

    O límite fiscal máximo conxunto de redución a aplicar na base impoñible por achegas e contribucións imputadas polo promotor aos sistemas de previsión social, incluídos, se é o caso, os excesos pendentes de reducir, procedentes dos exercicios 2018 a 2022, está constituído pola menor das cantidades seguintes:##1##

    1. O 30 por 100 da suma dos rendementos netos do traballo e de actividades económicas percibidos individualmente no exercicio.

      O concepto de rendemento neto do traballo que debe terse en conta para aplicar o citado límite é o definido no artigo 19 da Lei do IRPF, isto é, o resultado de diminuír o rendemento íntegro (incluíndo a minoración por aplicación da redución do artigo 18) no importe dos gastos deducibles.

      Polo que se refire ao rendemento neto de actividades económicas é o determinado con anterioridade á aplicación das reducións previstas artigo 32 da Lei de IRPF. Con esta finalidade, incluiranse na citada suma os rendementos netos de actividades económicas atribuídos por entidades en réxime de atribución de rendas, sempre que o contribuínte partícipe ou membro das mesmas exerza efectivamente a actividade económica.

    2. 1.500 euros anuais

      Este límite incrementarase nos seguintes supostos, nas contías que se indican:

      1.º En 8.500 euros anuais, sempre que tal incremento proveña de contribucións empresariais, ou de achegas do traballador ao mesmo instrumento de previsión social por importe igual ou inferior ás cantidades que resulten do seguinte cadro, en función do rendemento íntegro que perciba o traballador do empregador que realice as contribucións e do importe anual da contribución empresarial:

      Rendementos íntegros de traballo do traballador  Importe anual da contribución empresarial Achega máxima do traballador
      Rendementos íntegros do traballo igual ou inferior a 60.000 euros Igual ou inferior a 500 euros. O resultado de multiplicar a contribución empresarial por 2,5.
      Entre 500,01 e 1.500 euros. 1.250 euros, máis o resultado de multiplicar por 0,25 a diferenza entre a contribución empresarial e 500 euros.
      Máis de 1.500 euros. O resultado de multiplicar a contribución empresarial por 1.
      Rendementos íntegros do traballo superior a 60.000 euros Calquera importe O resultado de multiplicar a contribución empresarial por 1.

      Con esta finalidade, as cantidades achegadas pola empresa que deriven dunha decisión do traballador terán a consideración de achegas do traballador.

      2º. En 4.250 euros anuais, sempre que tal incremento proveña de calquera das seguintes achegas:

      • Achegas aos plans de pensións de emprego sectorial previstos no artigo 67.1.a) do texto refundido da Lei de Regulación dos Plans e Fondos de Pensións, realizadas por traballadores por conta propia ou autónomos que se adhiran aos devanditos plans por razón da súa actividade.

      • Achegas aos plans de pensións de emprego simplificado de traballadores por conta propia ou autónomos previstos no artigo 67.1 c) do texto refundido da Lei de Regulación dos Plans e Fondos de Pensións.

      • Achegas propias que o empresario individual ou o profesional realice a plans de pensións de emprego, de que sexa promotor e, ademais, partícipe.

      • Achegas propias que o empresario individual ou o profesional realice a Mutualidades de Previsión Social de que sexa mutualista.

      • Achegas propias que o empresario individual ou o profesional realice a plans de previsión social empresarial.

      Recuede: en todo caso, a contía máxima de redución por aplicación dos incrementos previstos nos números 1.º e 2.º anteriores será de 8.500 euros anuais.

      3º. Ademais, 5.000 euros anuais para as primas a seguros colectivos de dependencia satisfeita pola empresa.

      As achegas propias que o empresario individual realice seguros colectivos de dependencia de que, pola súa parte, sexa tomador e asegurado, consideraranse como contribucións empresariais, para os efectos do cómputo deste límite.

      Importante: teñase en conta que a base impoñible non pode resultar negativa como consecuencia das reducións, polo que o importe da mesma debe terse en conta tamén como límite da redución.

    Atención: produtos paneuropeos de pensións individuais

    Aos produtos paneuropeos de pensións individuais regulados no Regulamento (UE ) 2019/1238 do Parlamento Europeo e do Consello, do 20 de xuño de 2019, relativo a un produto paneuropeo de pensións individuais, serálles de aplicación no IRPF o tratamento que corresponda aos plans de pensións.

    En particular, a s achegas do aforrador aos produtos paneuropeos de pensións individuais poderán reducir a base impoñible xeral nos mesmos termos que as realizadas aos plans de pensións e incluiranse no límite máximo conxunto previsto no artigo 52 da Lei do IRPF para sistemas de previsión social.

  2. Particularidades relativas aos seguros de dependencia severa ou de gran dependencia

    Cabe distinguir entre seguros privados e seguros colectivos.

    • Seguros privados: sen prexuízo de que estean sometidas aos anteriores límites máximos de redución, no caso de primas satisfeitas a seguros privados que cubran o risco de dependencia severa ou de gran dependencia, deberá terse en conta, ademais, que o conxunto das reducións practicadas por todas as persoas que satisfagan primas a favor dun mesmo contribuínte, incluídas as do propio contribuínte, non poderá exceder de  1.500 euros anuais, con independencia da idade do contribuínte e, se é o caso, da idade do aportante .

    • Seguros colectivos: os compromisos por pensións asumidas polas empresas, incluíndo as prestacións causadas, poderán instrumentarse, mediante contratos de seguros colectivos de dependencia efectuada de acordo co previsto na disposición adicional primeira do texto refundido da Lei de Regulación dos Plans e fondos de Pensións, aprobado polo Real decreto Lexislativo 1/2002, do 29 de novembro, en que como tomador do seguro figurará exclusivamente a empresa e a condición de asegurado e beneficiario corresponderá ao traballador. Neste caso, as primas satisfeitas pola empresa en virtude destes contratos de seguro e imputadas ao traballador terán un límite de redución propio e independente de 5.000 euros anuais.

      Comentario: a disposición adicional primeira do texto refundido da Lei de Regulación dos Plans e Fondos de Pensións aprobadas por Real decreto Lexislativo 1/2002, do 29 de novembro foi modificada, con efectos desde o 4 de setembro de 2018, polo artigo primeiro do Real Decreto-lei 11/2018, do 31 de agosto, de transposición de directivas en materia de protección dos compromisos por pensións cos traballadores, prevención do branqueo de capitais e requisitos de entrada e residencia de nacionais de países terceiros e polo que se modifica a Lei 39/2015, do 1 de outubro, do Procedemento Administrativo Común das Administracións Públicas (BOE do 4 de setembro).

    Declaración Renda 2023: no apartado "Reducións por achegas e contribucións a sistemas de previsión social" da declaración de IRPF distínguese entre:

    • Achegas do traballador, agás as consignadas nos recadros [0438] e [0426] . Recadro [0465]

    • Achegas efectuadas pola empresa que deriven dunha decisión do traballador. Recadro [0438]

    • Achegas do traballador ao plan de pensións de emprego, mutualidade de previsión social ou plan de previsión social empresarial, sempre que se efectuasen contribucións empresariais. Recadro [0426]

    • Contribucións empresariais a sistemas de previsión social, agás as realizadas a seguros colectivos de dependencia e as achegas de empresarios individuais a sistemas de previsión social. Recadro [0427]

    • Achegas de traballadores por conta propia ou autónomos, empresarios individuais ou profesionais. Recadro [0499]

    • Contribucións a seguros colectivos de dependencia. Recadro [0466]

    C. Exceso de achegas e contribucións realizadas e non reducidas en exercicios  anteriores

    Normativa: Arts. 52.2 Lei IRPF ; art. 51 e disposición transitoria décimo noveno Regulamento  IRPF

    As cantidades achegadas polos partícipes, mutualistas ou asegurados a sistemas de previsión social, incluídas as realizadas polo promotor ou pola empresa que lles fosen imputadas que non puidesen ser obxecto de redución nos exercicios 2018 a 2022  por insuficiencia de base impoñible ou por aplicación do límite porcentual do 30 por 100 da suma dos rendementos netos do traballo e de actividades económicas, imputaranse ao presente exercicio, sempre que se solicitase nas respectivas declaracións poder reducir o exceso nos cinco exercicios seguintes.

    A redución dos excesos destes exercicios 2018 a 2022, realizarase con prioridade á que corresponda ás achegas efectuadas e contribucións imputadas no exercicio e efectuarase con suxeición aos límites máximos de redución que se indicaron con anterioridade.

    No referente á forma de aplicar os excesos o Regulamento do IRPF permite a aplicación do límite máximo incrementado (1.500 + 8.500 euros) con independencia da procedencia das cantidades achegadas, entendendo que no ano en que se aboasen respectaron as achegas anuais máximas (artigo 51.6 e disposición adicional décimo sexta da Lei do IRPF ).

    Por outra banda, os excesos correspondentes ás primas de seguros colectivos de dependencia imputaranse respectando o seu propio límite.

    No suposto de que o límite do 30 por 100 dos rendementos netos do traballo e de actividades económicas ou a contía da base impoñible xeral non permitan aplicar a totalidade das achegas e contribucións a sistemas de previsión social e das primas a seguros colectivos de dependencia, procederase da forma seguinte:

    1. Para calcular a redución aplicable determinaranse os importes máximos que poden ser reducidos por cada un destes conceptos (isto é, por un lado, por achegas e contribucións a sistemas de previsión social e, por outro, primas de seguros colectivos de dependencia) en cada un dos anos, tendo en conta as cantidades reducidas por excesos de anos anteriores.

      Con esta finalidade, para as achegas e contribucións a sistemas de previsión social, o límite do artigo 52.1.b) da Lei do IRPF opera polo seu importe total incrementado (1.500 + 8.500) sen distinguir a procedencia das achegas, sempre que no período en que se efectuasen cumprisen co límite financeiro da disposición adicional décimo sexta da Lei do IRPF na redacción que estivese en vigor no devandito período. O límite do 30 por 100 dos rendementos netos do traballo e de actividades económicas, ou, en último termo, a contía da base impoñible xeral, operará como límite global.

    2. Aplicaranse por orde de antigüidade os importes reducibles en cada un dos anos e no caso de que, para un mesmo ano, non puidesen reducirse a totalidade dos importes e concorresen nas mesmas achegas e contribucións empresariais e primas a seguros colectivos de dependencia, reduciranse,  en primeiro lugar, as achegas e contribucións empresariais. 

    Atención: o artigo 1 do Real decreto 1039/2022, do 27 de decembro (BOE do 29 de decembro) modificou o artigo 51 e a disposición  transitoria décimo novena do Regulamento do IRPF para facilitar a aplicación dos excesos pendentes de redución e mitigar a súa complexidade. Para iso, elimínase a aplicación proporcional dos excesos entre achegas ou contribucións, e permítese a aplicación do límite máximo incrementado (1.500 + 8.500 euros) con independencia da procedencia das cantidades achegadas, entendendo que no ano en que se aboasen respectaron as achegas anuais máximas. 

    D. Exceso de achegas e contribucións correspondentes ao exercicio

    Normativa: Arts. 52.2 Lei  IRPF  e 51 Regulamento  IRPF

    Como consecuencia da redución con carácter prioritario de cantidades pendentes de exercicios anteriores, é posible que non poidan reducirse a totalidade das  cantidades  achegadas no exercicio incluíndo, se é o caso, as  contribucións do promotor ou as realizadas pola empresa que lles fosen imputadas,  por insuficiencia de base impoñible ou por aplicación do límite porcentual do 30 por 100 da suma dos rendementos netos do traballo e de actividades económicas anteriormente comentado,  xerandose un exceso trasladable a exercicios futuros.

    O devandito exceso poderase aplicar nos cinco exercicios seguintes respectando o límite total incrementado a que se refire o 52.1 da Lei do IRPF, con independencia da procedencia das cantidades achegadas, sen incluír o límite adicional aplicable ás primas a seguros colectivos de dependencia satisfeita pola empresa. 

    Atención: as cantidades correspondentes ao exceso de achegas realizadas e non reducidas nos exercicios  2018 a 2022 pendentes de aplicar ao inicio do exercicio, as aplicadas na declaración e o remanente pendente de aplicación en exercicios futuros así como as achegas e contribucións de 2023 non aplicadas cuxo importe se solicita poder reducir nos 5 exercicios seguintes, deben facerse constar nos Anexos C.3 e C.4 da declaración, nalgún dos seguintes apartados, segundo corresponda: "Exceso non reducido das achegas e contribucións empresariais a sistemas de previsión social correspondentes aos exercicios 2018 a 2022 pendentes de reducir agás por contribucións empresariais a seguros colectivos de dependencia",  ou ben no apartado relativo a "Exceso non reducido derivado de contribucións empresariais a seguros colectivos de dependencia pendente de reducir nos exercicios seguintes".