Exemplo: Dedución pola adquisición de vehículos eléctricos e puntos de recarga

Dona A.P.R aboou o día 11 de xullo de 2023, tras a sinatura do acordo de compra, a cantidade de 14.400 euros ao concesionario XXX, en concepto de pagamento a conta da futura adquisición dun vehículo eléctrico puro (BEV) da categoría M, dunha casa comercial cuxo modelo figura na Base de Vehículos da IDEA, que vai destinar ao seu uso particular.

O prezo de venda ao público (incluído os impostos) do citado vehículo é de 48.000 euros e o importe pendente ata a súa adquisición aboarase a razón de tres pagamentos de 11.200 euros. Un en decembro de 2023, o segundo en decembro de 2024 e o último coa entrega do vehículo matriculado (prevista para primeiros de 2025).

Ademais, o concesionario, coa conformidade de dona A.P.R, realizou os trámites para solicitar a axuda de 4.500 euros do programa de incentivos ligados á mobilidade eléctrica (MOVES III) no marco do Plan de Recuperación, Transformación e Resiliencia Europeo.

Sen prexuízo do anterior, a contribuínte, que dispón dunha praza individual de aparcadoiro no garaxe comunitario do edifico onde reside, contratou en novembro de 2023 cunha empresa autorizada a instalación dun punto de recarga para o seu futuro automóbil, elixindo entre as alternativas posibles, a de instalar un punto de recarga na súa praza de aparcadoiro conectada por cable co contador eléctrico da súa vivenda (isto é, a través do Esquema 2 que recolle a Instrución Técnica Complementaria (ITC) BT-52 “Esquema individual cun contador común para a vivenda e a estación de recarga), xa que a estrutura do edificio e garaxe así permitíano.

Para iso, con carácter previo, e de acordo co artigo 17.5 da Lei 49/1960, do 21 de xullo, sobre propiedade horizontal, comunico á comunidade de propietarios a súa intención de instalar un punto de recarga de vehículos eléctricos na súa praza, achegando unha memoria técnica do trazado que ía seguir a canalización do cableado.

A instalación realizouse de acordo co Regulamento electrotécnico de baixa tensión, aprobado polo Real decreto 842/2002, do 2 de agosto, concretamente ITC-BT-52. Grado de protección IP e IK axeitado en función da situación segundo REBT, polo que unha vez finalizada se emitiu pola empresa instaladora o oportuno Certificado de Instalación Eléctrica (CIE).

O custo total acadou 2.500 euros que foron satisfeito por Dona A.P.R mediante transferencia bancaria o 20 de decembro de 2023. Solicitouse a axuda do programa de incentivos ligados á mobilidade eléctrica (MOVES III) prevista para infraestrutura de recarga de “Uso privado en sector residencia” que podería acadar 1.700 euros pero que aínda non foi concedida.

Nota: véxase Ia INSTRUCIÓN TÉCNICA COMPLEMENTARIA (ITC) BT-52 do Real decreto 1053/2014, do 12 de decembro, polo que se aproba unha nova Instrución Técnica Complementaria (ITC) BT 52 "Instalacións con fins especiais. Infraestrutura para a recarga de vehículos eléctricos", do Regulamento electrotécnico para baixa tensión, aprobado por Real decreto 842/2002, do 2 de agosto, e modifícanse outras instrucións técnicas complementarias do mesmo, a instrución 3. Esquemas de instalación para a recarga de vehículos eléctricos.

Determinar o importe da dedución que poderá aplicar en 2023.

Solución:

Dedución no IRPF pola adquisición de vehículos eléctricos novos

Nota previa: a contribuínte ten dereito a aplicar esta dedución por tratarse da compra para uso privado dun único vehículo novo de categoría M, pertencente ao tipo dos vehículos eléctricos puros (BEV) que figura na Base de Vehículos do IDAE e cuxo prezo de venda do vehículo non supera o importe máximo establecido para este tipo de vehículo no Anexo III do Real decreto 266/2021, que é de 45.000 euros sen IVE (21 %).

Ademais, pode aplicara en 2023 porque a contribuínte optou polo pagamento dunha cantidade a conta (14.400 euros) que supera o 25 por 100 do valor de adquisición do mesmo (48.000 euros) e, conforme ás estipulacións pactadas co concesionario, o pagamento completo e a adquisición do vehículo producirase antes de que finalice o segundo período impositivo inmediato posterior a aquel en que se produciu o pagamento da cantidade a conta.
- Base de dedución: 43.500
  
  Nota: Do valor de adquisición (48.000 euros) descóntase o importe da subvención pública (axuda Move III) solicitada (4.500 euros). Polo tanto, 48.000 – 4.500 = 43.500
- Base máxima da dedución: 20.000 euros
- Importe da dedución: (20.000 x 15 %) = 3.000
Dedución no IRPF pola instalación de infraestruturas de recarga

Nota previa: a contribuínte ten dereito a aplicar esta dedución xa que a instalación do punto de recarga realizouse en 2023 nun inmoble da súa propiedade (praza de aparcadoiro no garaxe comunitario), destínase a uso privado e conta coas autorizacións e permisos establecidos na lexislación vixente.
- Base de dedución: 2.500
  
  Nota: ata que a contribuínte non reciba resolución definitiva sobre a concesión da axuda que ha solicita para a infraestrutura de recarga, non debe descontar o importe da subvención da base de dedución.
  
  No caso da dedución por instalación de infraestruturas de recarga, a diferenza da dedución por adquisición de vehículos eléctricos novos, o D.A.58ª da Lei do IRPF non permite que se poidan descontar da base “aquelas contías que, se é o caso, fosen subvencionadas ou fosen a sero a través dun programa de axudas públicas” senón que no seu apartado 3 alude única e exclusivamente á posibilidade de descontar da base “aquelas contías que, se é o caso, fosen subvencionadas a través dun programa de axudas públicas”. Por iso, non procederá a súa dedución ata que non sexan concedidas.
  
  Agora ben, unha vez concedida deberase regularizar a situación tributaria de xeito que non se inclúan na base da dedución as contías correspondentes á devandita subvención (tendo como límite a base máxima anual de dedución). Para iso, de acordo co artigo 59 do Regulamento do IRPF, engadirase á cota líquida estatal da declaración do IRPF correspondente ao exercicio en que se concedesen a subvención o importe da dedución indebidamente practicada.
- Base máxima da dedución: 4.000 euros
- Importe da dedución: (2.500 x 15 %) = 375