Principais Novidades

• Prazo de presentación de declaracións:

  O prazo de presentación das autoliquidacións do Imposto sobre o Patrimonio do ano 2022, calquera que sexa o seu resultado (a ingresar ou negativa), é o comprendido entre os días 11 de abril e 30 de xuño de 2023, ambos os dous incluídos.

  Non obstante, se o resultado da declaración é a ingresar e o seu pagamento domicíliase en conta a presentación non poderá realizarse con posterioridade ao día 27 de xuño de 2023.

• Suxeitos pasivos por obriga real

  A disposición final terceira da Lei 38/2022, do 27 de decembro (BOE do 28 de decembro) modificou, con efectos desde o 29 de decembro de 2022, o apartado un do artigo 5 da Lei do Imposto sobre o Patrimonio, para considerar situados en territorio español os valores representativos da participación en fondos propios de calquera tipo de entidade, non negociados en mercados organizados, cuxo activo estea constituído en polo menos o 50 por 100, de forma directa ou indirecta, por bens inmobles situados en territorio español.

  Con iso preténdese suxeitar por obriga real ao Imposto sobre o Patrimonio ás persoas físicas non residentes titulares de participacións accionariais en entidades non residentes con activos inmobiliarios subxacentes radicados en España, corrixindo así unha discriminación inxustificada respecto do residente, por canto o non residente, polo feito de interpor unha persoa xurídica non residente, eludía o gravame do citado imposto.

• Bens e dereitos exentos.

  A disposición final segunda da Lei 12/2022, do 30 de xuño, de regulación para o impulso dos plans de pensións de emprego, pola que se modifica o texto refundido da Lei de Regulación dos Plans e Fondos de Pensións, aprobado por Real decreto Lexislativo 1/2002, do 29 de novembro (BOE do 1 de xullo), engadiu, con efectos desde o 2 de xullo de 2022, unha letra f) ao artigo 4. Cinco da Lei do Imposto sobre o Patrimonio para declarar exentos os dereitos de contido económico derivados das achegas a produtos paneuropeos de pensións individuais regulados no Regulamento (UE) 2019/1238 do Parlamento Europeo e do Consello, do 20 de xuño de 2019, relativo a un produto paneuropeo de pensións individuais.

• Base liquidable: redución por mínimo exento

  Con efectos desde o 1 de xaneiro de 2022, a Comunidade Autónoma de Andalucía regulou o mínimo exento para os contribuíntes con discapacidade fixandoo en:

  1. 1.250.000 euros, se o grao de discapacidade fóra igual ou superior ao 33 por 100 e inferior ao 65 por 100.

  2. 1.500.000 euros, se o grao de discapacidade fóra igual ou superior ao 65  por 100.

• Escalas autonómicas

  As Comunidades Autónomas de Andalucía e de Cataluña aprobaron para o exercicio 2022 novas escalas autonómicas.

• Bonificacións autonómicas

  • A Comunidade Autónoma de Andalucía aprobou unha bonificación xeral do 100 por 100 da cota minorada.

  • A  Comunidade Autónoma de Galicia aprobou unha bonificación xeral do 25 por 100 da cota minorada.

• Modelo do Imposto sobre o Patrimonio

  A principal novidade  na formalización do modelo de declaración do Imposto sobre o Patrimonio  é a introdución, en relación coa identificación de valores estranxeiros negociados en mercados organizados, dun novo campo, denominado “Código País”, coa finalidade de permitir unha mellor identificación destes valores estranxeiros cando os mesmos non dispón de ISIN nin tampouco se coñece o número de identificación da entidade emisora no país de residencia.