Denuncia de pagamentos en efectivo

Infraccións e sancións polo incumprimento

O incumprimento das limitacións aos pagamentos en efectivo constitúe unha infracción administrativa grave, que pode ser cometida tanto polas persoas ou entidades que paguen como polas que reciban total ou parcialmente cantidades en efectivo incumprindo a limitación establecida.

Pagador e receptor responderán de forma solidaria da infracción que se cometa e da sanción que se impoña, o que supón que a Axencia Tributaria poderá dirixirse indistintamente contra calquera deles ou contra ambos os dous.

A base da sanción será a contía paga en efectivo nas operacións de importe igual ou superior a 1.000 euros ou 10.000 euros (ou o seu contravalor en moeda estranxeira). A sanción consistirá nunha multa proporcional do 25 por cento da base da sanción,  contemplando unha redución do 50 por cento do importe da sanción se se cumpren determinadas condicións.

Non será responsable da infracción e polo tanto non se lle imporá sanción algunha pola operación realizada, o pagador ou receptor que  denuncie ante a Axencia Tributaria, dentro dos tres meses seguintes á data do pagamento efectuado en incumprimento da limitación,  sempre que facilite os seguintes datos á Axencia Tributaria:

• importe
• identidade da outra parte interveniente.

A denuncia que puidese presentar con posterioridade a outra parte interveniente entenderase por non formulada. En caso de presentación simultánea de denuncia por ambos os dous intervenientes, non se exonerará de responsabilidade a ningún deles .

A infracción prescribirá aos cinco anos, contado desde o día en que a infracción se cometese. Pola súa banda, a sanción derivada da comisión da infracción prescribirá aos cinco anos, que comezarán a contarse desde o día seguinte ao que adquira firmeza a resolución pola que se impón a sanción.