Normas de funcionamento

I. Natureza e composición do Foro

I.1. Natureza

O obxectivo do foro de Pequenas e Medianas Empresas é mellorar a relación entre a Axencia Estatal de Administración Tributaria (de agora en diante, Axencia Tributaria) e as pequenas e medianas empresas mediante o impulso dunha relación cooperativa baseada na transparencia e confianza mutua.

I.2. Composición

1. O Foro estará presidido polo titular da Dirección Xeral da Axencia Tributaria.

2. Serán membros do Foro:

   1. Por parte da Axencia Tributaria:

      Os titulares dos Departamentos de Xestión Tributaria, de Inspección Financeira e Tributaria, de Recadación e de Informática Tributaria e o titular do Servizo de Planificación e Relacións Institucionais.

   2. Por parte das Pequenas e Medianas Empresas:

      Un ou dous membros de cada unha das seguintes Federacións:

      • Confederación Española de Organizacións Empresariais.
      • Confederación Española da Pequena e Mediana Empresa.

3. En caso de vacante, ausencia ou enfermidade, os membros do Foro serán substituídos da seguinte maneira:

   1. No caso da Axencia Tributaria, o titular da Dirección Xeral será substituído polo titular do Departamento de Xestión Tributaria e no caso dos demais membros o suplente deberá ter, polo menos, a categoría de subdirector xeral ou asimilado e pertencer ao mesmo órgano que o titular.

   2. No caso de Federacións, o suplente deberá, así mesmo, ser un membro da mesma Federación designada para a súa representación ante o Foro.

   A designación do suplente deberá ser comunicada coa suficiente antelación para ser tida en conta nas correspondentes convocatorias.

4. A Subdirección Xeral de Comunicación Externa do Servizo de Planificación e Relacións Institucionais realizará as funcións de Secretaría do Foro. Así mesmo, colaborarán de forma rotatoria por períodos anuais na Secretaría Técnica os representantes de Federacións participantes no Foro que o desexen.