Os gastos públicos

Cunha definición sinxela, o gasto público é o emprego de caudais públicos para a satisfacción das necesidades públicas. Entre estes gastos que as Administracións Públicas realizan para satisfacer as necesidades colectivas, poden citarse, a título de exemplo, os seguintes:

Os sanitarios, como os destinados á construción e mantemento de hospitais e centros de saúde; á adquisición de equipos e aparellos médicos; á adquisición de medicamentos; ou ao aboamento dos soldos do persoal sanitario...
Os educativos, como os ocasionados pola construción de centros escolares; pola compra de material didáctico, equipos informáticos ou mobiliario; ou polo pagamento dos soldos ao persoal docente...
Os culturais e recreativos, como os dirixidos a construír, equipar e manter museos, bibliotecas, parques, xardíns, instalacións deportivas...
Os de seguridade e defensa, para custear a policía, os bombeiros, os servizos de protección civil en xeral e as Forzas Armadas.
Os orixinados polo pagamento das pensións, as prestacións por desemprego e outras prestacións ou axudas de carácter social.
Os destinados á construción e mantemento de infraestruturas, como as estradas, autoestradas e autovías, os ferrocarrís, os portos, os aeroportos...
Os de recollida do lixo, abastecemento de auga potable, transporte público...