Reducións na base impoñible

As rendas procedentes da cesión do dereito de uso ou de explotación de patentes, debuxos ou modelos, planos, fórmulas ou procedementos secretos, de dereitos sobre informacións relativas a experiencias industriais, comerciais ou científicas, terán dereito a unha redución na base impoñible na porcentaxe que resulte de multiplicar por un 60 % o resultado do seguinte coeficiente:

1. No numerador, os gastos incorridos pola entidade cedente directamente relacionados coa creación do activo, incluídos os derivados da subcontratación con terceiros non vinculados con aquela. Estes gastos incrementaranse nun  30 %, sen que, en ningún caso, o numerador poida superar o importe do denominador.

2. No denominador, os gastos incorridos pola entidade cedente directamente relacionados coa creación do activo, incluídos os derivados da subcontratación e, se é o caso, da adquisición do activo.

En ningún caso incluiranse no coeficiente anterior gastos financeiros, amortizacións de inmobles ou outros gastos non relacionados directamente coa creación do activo.

O anterior tamén resultará de aplicación no caso de transmisión dos activos intanxibles referidos no mesmo, cando a devandita transmisión se realice entre entidades que non teñan a condición de vinculadas.

Para a aplicación da redución prevista no artigo 23 da  LIS deberán cumprirse os seguintes requisitos:

1. Que o cesionario utilice os dereitos de uso ou de explotación no desenvolvemento dunha actividade económica e que os resultados desa utilización non se materialicen na entrega de bens ou prestación de servizos polo cesionario que xeren gastos fiscalmente deducibles na entidade cedente, sempre que, neste último caso, a devandita entidade estea vinculada co cesionario.

2. Que o cesionario non resida nun país ou territorio de nula tributación ou cualificado como paraíso fiscal, non sendo que estea situado nun Estado membro da Unión Europea e o contribuínte acredite que a operativa responde a motivos económicos válidos e que realice actividades económicas.

3. Cando un mesmo contrato de cesión inclúa prestacións accesorias de servizos deberá diferenciarse no devandito contrato a contraprestación correspondente aos mesmos.

4. Que a entidade dispoña dos rexistros contables necesarios para poder determinar os ingresos e gastos directos correspondentes aos activos obxecto de cesión.

Ata o 30 de xuño de 2016, no caso de cesión de activos intanxibles, aos efectos da súa integración na base impoñible nun 40 %do seu importe, con independencia de que o activo estea ou non recoñecido no balance da entidade, entenderase por rendas a diferenza positiva entre os ingresos do exercicio procedente da cesión do dereito de uso ou de explotación dos activos, e as cantidades que sexan deducidas no mesmo por aplicación dos artigos 12.2  ou 13.3 da LIS, se é o caso, e por aqueles gastos do exercicio directamente relacionado co activo cedido.

Desde o 1 de xullo de 2016, no caso de cesión de activos intanxibles, aos efectos da súa integración na base impoñible  coa redución prevista no artigo 23 da LIS , con independencia de que o activo estea ou non recoñecido no balance da entidade, entenderase por rendas a diferenza positiva entre os ingresos do exercicio procedente da cesión do dereito de uso ou de explotación dos activos, e as cantidades que sexan deducidas no mesmo por aplicación do artigo 12.2 da LIS , se é o caso, e por aqueles gastos do exercicio directamente relacionado co activo cedido.

En ningún caso darán dereito á redución as rendas procedentes da cesión do dereito de uso ou de explotación, ou da transmisión, de marcas, obras literarias, artísticas ou científicas, incluídas as películas cinematográficas, de dereitos persoais susceptibles de cesión, como os dereitos de imaxe, de programas informáticos, equipos industriais, comerciais ou científicos, nin de calquera outro dereito ou activo distinto dos sinalados no apartado 1 do artigo 23 da LIS.

Con carácter previo á realización das operacións, o contribuínte poderá solicitar á Administración tributaria un acordo previo de cualificación dos activos como pertencentes a algunha das categorías a que se refire o artigo 23.1 da LIS, e de valoración en relación cos ingresos procedentes da cesión daqueles e dos gastos asociados, así como das rendas xeradas na transmisión.

A referida solicitude acompañarase dunha proposta de valoración, que se fundamentará no valor de mercado.

A proposta poderá entenderse desestimada unha vez transcorrido o prazo de resolución.

A resolución deste acordo requirirá informe vinculante emitido pola Dirección Xeral de Tributos, en relación coa cualificación dos activos. En caso de estimalo procedente, a Dirección Xeral de Tributos poderá solicitar opinión non vinculante sobre o asunto, ao Ministerio de Economía e Competitividade.