4.1.2. Intercambio de información con outras administracións públicas

Por veces, os convenios que a Axencia Tributaria subscribe con outras Administracións públicas contemplan, non só a cesión de información, senón tamén a obtención da mesma en poder desas Administracións sobre bens, dereitos, rendas ou actividades dos contribuíntes. A información así captada permite mellorar os servizos prestados ao contribuínte para favorecer o cumprimento voluntario das súas obrigas fiscais e, sobre todo, a loita contra a fraude fiscal.

Entre os convenios de intercambio de información destacan os subscritos pola Axencia Tributaria coas Comunidades Autónomas de réxime común, as Facendas forais, a Dirección Xeral do Catastro, a Tesourería Xeral da Seguridade Social, a Inspección de Traballo, a Dirección Xeral de Tráfico e o Consello Xeral do Notariado  e Rexistradores, entre outros.

Froito desta colaboración, a Axencia  recibiu durante 2013 información relevante para o desempeño das súas funcións. Así, da TXSS recibiuse o censo de empresas e traballadores, ficheiros de cotizacións de autónomos ou información mensual dos modelos TC1; da Dirección Xeral do Catastro recibíronse os padróns de inmobles de natureza urbana, rústica e de características especiais, ademais das operacións inmobiliarias rexistradas en Notarías e Rexistros da Propiedade; da Dirección Xeral de Tráfico recíbese semanalmente información sobre altas, baixas e transmisións de vehículos; e, ademais,  o Banco de España remite mensualmente operacións de contas no estranxeiro, tráfico de divisas e préstamos entre residentes e non residentes.

Así mesmo, a Axencia Tributaria subministrou durante 2013, ás Comunidades Autónomas de réxime común máis de 91 millóns de rexistros relativos aos Impostos sobre o Patrimonio, Actividades Económicas e Determinadas Medios de Transportes (matriculación), así como as variacións producidas nese período no Censo único de contribuíntes. Pola súa banda, as Comunidades Autónomas subministraron 2 millóns de rexistros do Imposto sobre Sucesións e Doazóns e do Imposto sobre Transmisións Patrimoniais e Actos Xurídicos Documentados.

Ademais, a Axencia Tributaria subministrou ás catro Facendas forais máis de 42 millóns de rexistros en 2013 e recibiu destas 11 millóns. En ambos os dous casos, a información intercambiada refírese ás declaracións informativas presentadas nos seus respectivos ámbitos de competencia.

Igualmente, seguiuse impulsando a adhesión das Entidades Locais aos catro Convenios de colaboración subscrita entre a Axencia Tributaria e a Federación Española de Municipios e Provincias. Así, a 31 de decembro de 2013, encontrábanse adheridas ao Convenio de subministración de información 1.541 entidades locais, 848 ao Convenio de intercambio de información tributaria e colaboración na xestión recadadora, 30 ao Convenio de recadación executiva e 182 ao Convenio de presentación telemática. As adhesións a estes Convenios durante 2013 foron: 44 entidades locais ao Convenio de subministración, 49 ao Convenio de intercambio, 9 ao de recadación executiva e 2 ao Convenio de presentación telemática.

Por último, a Axencia Tributaria colabora tamén na xestión recadadora da Tesourería Xeral da Seguridade Social, Comunidades Autónomas e Entidades Locais mediante a subministración de información sobre contas bancarias e fondos de investimento e o embargo de devolucións tributarias a favor de contribuíntes que teñan débedas en período executivo coas citadas Administracións. Neste sentido, subministráronse máis de 43 millóns de rexistros de contas bancarias e fondos de investimento e hanse embargado devolucións xestionadas na Axencia Tributaria por importe de 231,7 millóns de euros que se transferiron ás arcas das Administracións citadas anteriormente.