3.2.1. Impacto de cambios normativos

Un dos trazos diferenciadores de 2014 con respecto a anos anteriores foi a escasa importancia nos ingresos polos cambios normativos. No conxunto do ano estes cambios tiveron un impacto agregado valorado en 125 millóns.

Por figuras, o maior impacto correspondeu ao Imposto sobre Sociedades (-1.277 millóns). O carácter negativo deste impacto foi consecuencia, por un lado, das medidas que só estiveron vixentes temporalmente, como os gravames especiais (hai que lembrar que os impactos se miden en termos diferenciais con respecto ao ano anterior), e, por outro, que o impacto das novas medidas sobre a cota diferencial (novo tratamento das perdas en entidades participadas, limitación dos gastos de amortización e outros) non se traduciu en maiores ingresos en 2014 senón en minorar os saldos acumulados de bases impoñibles negativas (é dicir, en aumentar ingresos futuros en vez de presentes).

Por medidas, hai que distinguir as que entraron en vigor por primeira vez en 2014 de que eran herdadas de anos anteriores. Nas primeiras (novas medidas no IRPF, o réxime de caixa no IVE, a exención parcial do Imposto sobre a Electricidade e o novo Imposto sobre Gases Fluorados de Efecto Invernadoiro), o impacto neto foi de 82 millóns de euros.

Nas de anos anteriores con efecto en 2014, hai que distinguir dous grupos. Por un lado, estarían os impactos procedentes de medidas que entraron en vigor a comezos de 2013, cuxo primeiro ingreso produciuse a partir de febreiro dese ano e que, en consecuencia, o seu efecto prolongouse ata os primeiros meses de 2014 (a fiscalidade ambiental, as modificacións nos Impostos Especiais sobre  Hidrocarburos e sobre o Carbón, o gravame especial sobre os premios de determinadas lotarías e apostas, as variacións de tipos nos Impostos Especiais sobre labores do tabaco e sobre o alcohol e, aínda que con outras características, a recuperación da paga extra dos empregados públicos e a fin do tipo reducido na vivenda). Todas estas medidas incrementaron os ingresos en 1.929 millóns e fixérono, ademais, na primeira parte do ano. Doutra banda, figurarían os efectos nas cotas diferenciais do IRPF e do Imposto sobre Sociedades que responden aos axustes entre as retencións e os pagamentos a conta afectados polas medidas en 2013 e a súa liquidación na declaración anual presentada en 2014. Neste caso os impactos son negativos e producíronse na segunda metade do ano, anulando, practicamente, o nesgo alcista que tiveran as medidas anteriores.

As principais cifras ofrécense no seguinte cadro do Anexo: