3.2.2. Evolución de ingresos por Imposto sobre a Renda das Persoas Físicas

Os ingresos por IRPF medraron, en 2014, un 3,9 por cento. A tendencia foi crecente ao longo do ano e coherente coa evolución á alza das rendas brutas das familias. Estas rendas medraron desde o segundo trimestre do ano tras caer ininterrompidamente (coa única excepción do repunte pasaxeiro do cuarto trimestre de 2013 pola paga extra dos empregados públicos) desde o terceiro trimestre de 2011. As causas deste crecemento foron catro: a creación de emprego, o incremento dos beneficios dos empresarios individuais, o sostido aumento da masa de pensións e o intenso crecemento das ganancias patrimoniais.