3.2.1. Evolución de ingresos por Imposto sobre a Renda das Persoas Físicas

Os ingresos por IRPF en 2017 medraron un 6,4 por cento (4,9 por cento sen cambios normativos). As retencións por rendas do traballo medraron un 3,4 por cento debido, fundamentalmente, á creación de emprego, xa que o salario e o tipo medio mantivéronse practicamente estables. No resto das retencións, o máis salientable foi o excepcional crecemento (42,7 por cento) das retencións por ganancias patrimoniais en fondos de investimento, que se viu beneficiado pola nova retención sobre os dereitos de subscrición, aínda que a causa principal da súa recuperación foi a mellora da cotización dos valores de renda variable ao longo de 2017. Os pagamentos fraccionados rexistraron un crecemento do 7,6 por cento. No referente á declaración anual, o incremento dos ingresos con respecto ao ano anterior (2001 millóns) foi consecuencia, tanto dos maiores ingresos brutos (1.168 millóns) como das menores devolucións solicitadas e realizadas (833 millóns).

Evolución de ingresos por Imposto sobre Sociedades

Os ingresos no Imposto sobre Sociedades aumentaron un 6,8 por cento en 2017. O crecemento do imposto produciuse nun contexto de mellora dos beneficios. Os pagamentos fraccionados, principal compoñente do imposto, medraron á mesma taxa que o conxunto do imposto. Descontando o aumento asociado ao RDL 3/2016 (301 millóns), o incremento dos pagamentos sería do 5,3 por cento (e do 6,8 por cento se non se inclúen os outros ingresos, cun crecemento excepcional en 2016). Por último, hai que destacar o aumento dos ingresos brutos procedentes da declaración anual (un 8 por cento, con consecuencias ademais nos pagamentos fraccionados das pemes que ingresan segundo a última cota anual presentada).