3.2.3. Evolución de ingresos por Impostos Especiais

En 2017 os ingresos por Impostos Especiais medraron un 2,2 por cento, taxa que se reduce ata o 1,3 por cento ao corrixir a distorsión asociada ás devolucións do céntimo sanitario.

O Imposto sobre Hidrocarburos medrou (descontando as devolucións do céntimo sanitario) un 1,6 por cento, arredor dun punto menos que en 2016. Os consumos que marcan a evolución dos ingresos, os de gasolinas e gasóleo de automoción, mostraron unha tendencia lixeiramente desacelerada ao longo de todo o ano. Esta tendencia viuse compensada polo aumento dos consumos do gas natural utilizado na xeración de enerxía eléctrica, consecuencia do mal ano hidrográfico. Este feito está tamén detrás do considerable incremento no Imposto sobre o Carbón (36,2 por cento). Os ingresos no Imposto sobre Labores do Tabaco sufriron unha pequena diminución (-0,7 por cento) a pesar da subida de tipos que tivo lugar en decembro de 2016. Hai que lembrar que os anuncios de subida de tipos provocan un adiantamento das saídas a consumo desde os depósitos fiscais nas semanas anteriores á mesma e, consecuentemente, un descenso desas saídas nos meses posteriores. No Imposto sobre a Electricidade os ingresos medraron de forma moderada (1,2 por cento). O mesmo aconteceu cos consumos físicos, de maneira que os incrementos que se viron na recadación nos meses centrais do ano estiveron provocados polas subidas de prezos. Nos ingresos polos impostos sobre o consumo de alcohol (Alcohol e Bebidas Derivadas e Cervexa) o crecemento foi do 6,2 por cento (7,2 por cento no primeiro e 3,5 por cento no segundo). Se se resta o impacto da subida de tipos no Alcohol e Bebidas Derivadas, o incremento sería do 3 por cento que aínda así supón unha mellora con respecto ao ano anterior (1,5 por cento en 2016).