3.2.1. Evolución de ingresos por Imposto sobre a Renda das Persoas Físicas

As retencións do traballo medraron un 6,5 por cento, cun aumento dun 7 por cento no sector privado e do 5,8 por cento nas retencións sobre os salarios e pensións pagas polas AA .PP. A declaración anual achegou máis de 1.000 millóns ao crecemento do    IRPF en 2018, cun aumento dos ingresos brutos do 11,3 por cento (polo elevado crecemento no exercicio anterior das rendas non suxeitas por completo a retencións e pagamentos a conta), mentres que as devolucións medraron tan só un 1,1 por cento. Os pagamentos fraccionados e as retencións por rendas de capital mobiliaria medraron por riba do 6 por cento. No lado negativo, as retencións por ganancias patrimoniais en fondos de investimento reducíronse un 20 por cento, consecuencia dos elevados niveis acadados en 2017 e dos malos resultados nos mercados secundarios de valores.

Evolución de ingresos por Imposto sobre Sociedades

En 2018 os ingresos no Imposto sobre Sociedades aumentaron un 7,3 por cento, con elevados crecementos dos pagamentos fraccionados (11,7 por cento) polo bo comportamento dos beneficios, e das devolucións (14,1 por cento), ligado ás declaracións e liquidacións de anos anteriores e ao adianto no ritmo de realización. A evolución dos pagamentos fraccionados estivo marcada polo forte incremento do segundo pagamento a conta, que se concentrou nun número reducido de grupos, mentres que no resto de grupos e Grandes Empresas o crecemento foi máis modesto (no medio do 4 por cento) e coherente coa evolución dos beneficios e da base impoñible do pagamento.