4.1.3. Asistencia a persoas con discapacidade e maiores

Co obxectivo de que o labor de información e asistencia prestada pola Axencia Tributaria chegue a todos os contribuíntes, considerouse necesario incidir na atención a determinados colectivos que poden ter máis dificultades para o acceso á mesma. Así, a Axencia Tributaria asinou o 19 de decembro de 2022 un protocolo coa Plataforma de Maiores e Pensionistas que ten por obxecto establecer as pautas básicas para facilitar a asistencia ás persoas maiores, impulsando actuacións que lles aseguren unha información completa e actualizada con respecto aos seus dereitos, así como a prestación do apoio e asesoramento preciso no cumprimento das súas obrigas tributarias.

Así mesmo, a Axencia Tributaria ten subscrito, desde o ano 2004, un Convenio de colaboración co Comité Español de Representantes de Persoas con Discapacidade (CERMI) e coa Fundación ONCE. No marco deste Convenio apróbase, de acordo coas devanditas entidades, un Plan Anual de Asistencia ás Persoas con Discapacidade no ámbito da Axencia Tributaria. No devandito plan inclúense actuacións de información e asistencia, accesibilidade na web e nas oficinas, accións de formación tendente a sensibilizar os funcionarios da Axencia Tributaria coas necesidades deste colectivo, etc. Durante 2022, cumpríronse, practicamente, a totalidade das previsións incluídas no Plan Anual.

Ademais, no ano 2022 continuouse atendendo a demanda de información estatística das Asociacións asinantes do Convenio, coa publicación estatística referida aos datos de IRPF 2020 do conxunto de persoas con discapacidade. O compromiso da Axencia Tributaria, en relación con este colectivo, é manter esta publicación en períodos sucesivos, incrementando a serie de publicacións estatísticas por impostos cuxo contido está accesible na páxina web da Axencia Tributaria.

No Cadro nº 22. Accesibilidade aos edificios da Axencia Tributaria  (Anexo) móstrase a situación durante o exercicio 2022.

Contabilizáronse unicamente os inmobles que figuran nos anexos I (Delegacións Especiais e Delegacións da Axencia Tributaria) e anexo II (Administracións da Axencia Tributaria) da Resolución do 13 de xaneiro de 2021, da Presidencia da Axencia Tributaria, pola que se establece a estrutura e organización territorial da Axencia Tributaria (BOE do 14 de xaneiro).

A accesibilidade acada ao 99,22 %dos edificios (99,98% en entrada principal, máis o 8,24% en entrada alternativa). Os edificios con aseos adaptados representan un 80,39% do total. No referente a ascensores, convén aclarar que hai 46 inmobles cuxas actividades se desenvolven nunha única planta, e polo tanto non resulta necesario dispor de ascensor.