A Axencia Tributaria pon a disposición dos cidadáns novos trámites en sede electrónica para facilitar a presentación das comunicacións reguladas no texto refundido da Lei Concursal, que foron deseñados polo Departamento de Recadación.

Desta maneira, a través da sede electrónica da Axencia Tributaria, o cidadán incurso nun preconcurso ou nun procedemento concursal por ter débedas pendentes xestionadas pola Axencia Tributaria poderá presentar (el mesmo ou a través do seu representante) os formularios previstos na normativa para situacións concursais, concursos de acredores e procedementos especiais para microempresas:

• Así, no caso de que se encontre en situación concursal, poderá comunicar á Axencia Tributaria tanto a apertura de negociacións previas cos acredores para acadar un plan de reestruturación (ou ben, en caso de microempresas, un plan de continuación ou de liquidación), a proposta de plan de reestruturación, así como calquera outra documentación ou información relevante.

• Pola súa parte, o que se encontre en concurso de acredores  poderá comunicar á Axencia Tributaria as propostas de adhesión a convenios e as propostas de subscrición de acordos singulares.

• Por último, no caso do procedemento especial para microempresas  (xa sexa procedemento de continuación ou procedemento de liquidación), tamén poderá presentar diferentes comunicacións: a comunicación de solicitude de apertura do procedemento especial de continuación, a comunicación do auto de apertura do procedemento especial, a comunicación de admisión a trámite da proposta do plan de continuación, a comunicación de apertura do prazo de votación ao plan de continuación, a comunicación do plan de liquidación, a comunicación do informe mensual de liquidación, así como calquera outra documentación ou información relevante.

Ademais, en cada un dos apartados anteriores, incorpórase unha relación de preguntas básicas, coas súas correspondentes respostas; unha sección de axuda e a normativa que os regula; para facilitar a comprensión de cada trámite.

Podes consultar estes trámites na seguinte ligazón.