A Axencia Tributaria entregou os premios aos alumnos gañadores e finalistas do concurso nacional 2021-2022 para centros escolares, un certame que a Axencia vén convocando anualmente no marco do seu Programa de Educación Cívico-tributaria e que agora retoma tras o concurso celebrado en 2019, antes da crise sanitaria. Os galardóns concedéronse nas tres modalidades existentes: ‘Redacción’ para alumnos de Terceiro Ciclo de Primaria e de ESO-Bachillerato-FP, e ‘Peza Publicitaria’ para alumnos de ESO-Bachillerato-FP.

Os tres alumnos gañadores, alumnos que o pasado ano cursaron Primaria e ESO en centros de Ávila e Pontevedra, recibiron, do mesmo xeito que os finalistas, os premios nun acto ao que asistiron familiares e profesores. Tras a entrega dos premios por parte do secretario de Estado, Jesús Gascón, e a directora xeral da Axencia Tributaria, Soledad Fernández Doctor, os escolares leron e presentaron os seus traballos, escollidos entre os previamente seleccionados polas distintas delegacións territoriais da Axencia.

Os traballos gañadores e finalistas publícanse no Portal do Programa de Educación Cívico-tributaria da AEAT.

A celebración do concurso forma parte dunha serie de medidas que teñen por obxecto reforzar o Programa de Educación Cívico-tributaria que a Axencia vén desenvolvendo desde o ano 2003 e que prevé intensificar e desenvolver, de acordo co Plan Estratéxico 2020-2023.

O programa conta coa participación de funcionarios que imparten charlas a alumnos dos últimos cursos de educación primaria, ESO, Bacharelato, Formación Profesional e universidades. As actividades desenvolvidas nos centros complétanse con actividades de formación para o profesorado e xornadas de portas abertas para colexios nas 52 delegacións provinciais da Axencia.

O pasado ano, 255 formadores das distintas delegacións territoriais da AEAT impartiron máis de 2.500 horas de formación a máis de 53.000 alumnos, superando así a capacidade formativa previa á redución desta actividade que se produciu nos anos 2020 e 2021 como consecuencia da crise sanitaria do COVID-19 .

O obxectivo destas charlas é explicar aos máis novos o sentido social que ten o pagamento dos impostos e a súa correspondencia co gasto público, así como o prexuízo que a fraude fiscal supón para a sociedade no seu conxunto.

Enténdese así que a incorporación de contidos de educación cívico-tributaria desde a escola ata a universidade axuda os mozos a desenvolver un comportamento solidario. Os traballos seleccionados para este concurso nacional incorporan estas mensaxes e mostran a necesidade dunha correspondencia ética entre intereses persoais e beneficios comúns nunha sociedade.

Alumnos premiados no concurso nacional 2021-2022

Categoría – ‘Redacción’ de Primaria

Gañador

- Víctor Rodríguez Mayoral, 6º de Primaria do CEIP Arturo Duperier de Ávila.

Finalistas

- Lucía Díez Pinto, 6º de Primaria do CEIP Trajano de Mérida.

- Jimena Quinteiro Espiñeira, 5º de Primaria do colexio Sagrado Corazón de Jesús de Pontevedra.

Categoría – ‘Redacción’ de ESO-Bachillerato-FP

Gañadora

- Violeta Fortes Villaverde, 4º de ESO do IES Sánchez Cantón de Pontevedra.

Finalistas

- Irene Virto Angulo, 1º de Bacharelato do IES Antonio Machado de Soria.

- David Bonet Montejo, 1º de Bacharelato do col·legi Lestonnac de Lleida.

Categoría – ‘Peza publicitaria’

Gañadora

- Claudia Casal Campelo, 4º de ESO do IES Sánchez Cantón de Pontevedra.

Finalistas

- Dulce Suyapa García Amaya, 1º de Bacharelato do colexio Gamo Diana de Madrid.

- Salma Akharraz Echchaqam, Marina Beltrán Manjón, Radostina Krasimirova Voykova, Iker Larrubia Díaz, Esperanza López Martínez, Lucía Pedregosa Galiana e Marta Zapata Bibiloni, 1º de Bacharelato do IES Nou Llevant de Palma de Mallorca.