Por Resolución da Presidencia da Axencia Estatal de Administración Tributaria, o 22 de decembro de 2022 foi aprobado o código ético para a Axencia Tributaria.

Este código, canda a Comisión Consultiva de Ética creada por Resolución do presidente da Axencia Tributaria do 17 de xuño de 2021, xorden en cumprimento da vontade expresada pola Axencia Tributaria no seu Plan Estratéxico 2020-2023 de asumir un compromiso explícito cos valores e principios que forman parte do código ético que figura no Estatuto Básico do Empregado Público.

Desta forma, a Comisión Consultiva de Ética conta para realizar o seu labor cun código que non só incorpora os principios éticos e normas de conduta recollida no Estatuto, senón que ten a virtualidade de adaptarse á especificidade propia da Axencia Tributaria.

Os principios éticos do Estatuto intégranse neste código en cinco categorías que reflicten os compromisos das modernas administracións tributarias, e que se despregan en regras de conduta que se adaptan ás características da Axencia Tributaria. Os principios que sustentan estas regras son a observancia da Constitución e as Leis, a integridade, a boa xestión e responsabilidade, a centralidade do cidadán, e a lealdade institucional e ás persoas.

Para a elaboración deste código tomáronse en consideración os códigos éticos vixentes nas administracións tributarias máis avanzadas, así como as recomendacións do Consello da OCDE sobre Integridade Pública.

Co obxecto de velar pola axeitada interpretación do código, a Comisión Consultiva de Ética emitirá as opinións e efectuará as recomendacións que resulten procedentes, correspondendo ao Servizo de Auditoría Interna o seguimento do seu cumprimento e avaliación, con facultades se é o caso, para propor a súa revisión e actualización.

Compromiso ético da Axencia Tributaria