O artigo 19.Dous.2 da Lei 31/2022, do 23 de decembro, de Orzamentos Xerais do Estado para o ano 2023 estableceu os seguintes incrementos respecto das retribucións vixentes a 31 de decembro de 2022 e con efectos, en ambos os dous casos, do 1 de xaneiro de 2023:

1. «Incremento vinculado á evolución do Índice de Prezos ao Consumo Harmonizado (IPCA). Se a suma do IPCA do ano 2022 e do IPCA adiantado do mes de setembro de 2023 fóra superior ao 6 por cento, aplicarase un incremento retributivo adicional máximo do 0,5 por cento. Con esta finalidade, unha vez publicados polo Instituto Nacional de Estatística (INE) os datos do IPCA adiantado do mes de setembro de 2023, aprobarase a aplicación deste incremento mediante Acordo do Consello de ministros, que se publicará no BOE.

2. Incremento vinculado á evolución do Produto Interior Bruto (PIB) nominal no ano 2023. Se o incremento do PIB nominal igualase ou superase o estimado polo Goberno no cadro macroeconómico que acompaña á elaboración da presente lei de Orzamentos, aplicarase un aumento retributivo complementario do 0,5 por cento.

   Con esta finalidade, unha vez publicados polo INE os datos de avance do PIB de 2023, aprobarase a aplicación deste incremento mediante Acordo do Consello de ministros, que se publicará no BOE.»

En relación co anterior, procede citar a Resolución do 7 de febreiro de 2024, da Secretaría de Estado de Orzamentos e Gastos, pola que se publica o Acordo do Consello de ministros do 6 de febreiro de 2024, polo que se aproba o incremento do 0,5 por cento nas retribucións do persoal ao servizo do sector público en aplicación do previsto no artigo 19.Dous.2.b) da Lei 31/2022, do 23 de decembro, de Orzamentos Xerais do Estado para o ano 2023 (BOE do día 8 de febreiro). A Instrución primeira desta Resolución establece:

"O incremento complementario do 0,5 por cento calcularase sobre as retribucións vixentes a 31 de decembro de 2022, terá efectos do 1 de xaneiro de 2023 e aboarase na nómina do mes de febreiro de 2024, non sendo que a habilitación responsable non dispoña de todos os elementos formais necesarios ou noutros supostos en que por motivos técnicos non resulte posible, en cuxo caso aboarase na primeira nómina en que sexa posible. 

Os atrasos desde o mes de xaneiro de 2023 correspondentes ao incremento do 0,5 por cento aboaranse nos mesmos termos fixados no parágrafo anterior."

Desde o punto de vista tributario, a imputación temporal de rendas encóntrase recollida no artigo 14 da Lei 35/2006, do 28 de novembro, do Imposto sobre a Renda das Persoas Físicas e de modificación parcial das leis dos Impostos sobre Sociedades, sobre a Renda de non Residentes e sobre o Patrimonio, artigo que na letra a) do apartado 1 establece como regra xeral para os rendementos do traballo a súa imputación “ao período impositivo en que sexan esixibles polo seu perceptor”.

En consecuencia:

• Os importes retributivos correspondentes ao incremento previsto no artigo 19.Dous.2.b) da Lei 31/2022, do 23 de decembro, de Orzamentos Xerais do Estado para o ano 2023, deben imputarse ao período en que, a través da súa regulación nos preceptos antes citados, son esixibles, isto é o período impositivo 2024.

• Os pagadores destes incrementos retributivos deberán declararos no modelo 190 correspondente ao exercicio 2024 (a presentar en xaneiro de 2025).

• Os perceptores destes incrementos retributivos declararanos, se é o caso, na súa declaración de IRPF do exercicio 2024 (a presentar en 2025). En ningún caso deberán incluírse na declaración de IRPF do exercicio 2023, cuxo prazo de presentación iníciase o día 3 de abril de 2024.