No BOE de día 6 de novembro publicouse o Real Decreto-lei 6/2024, do 5 de novembro, polo que se adoptan medidas urxentes de resposta ante os danos causados pola Depresión Illada en Niveis Altos (DANA) en diferentes municipios entre o 28 de outubro e o 4 de novembro de 2024.

As principais medidas fiscais acordadas por este Real Decreto-lei son as seguintes:

• Suspensión do segundo pagamento do IRPF da campaña de Renda 2023 para aqueles contribuíntes de zonas afectadas pola DANA que o tivesen pendente de pagamento. Este pagamento, previsto para o 5 de novembro, suspéndese e aprázase durante tres meses.

• Concesión de axudas directas aos traballadores autónomos e empresas que sexan contribuíntes do IRPF por actividades económicas, ou contribuíntes do Imposto sobre Sociedades. No caso de empresas o importe destas axudas dependerá do volume de operacións do exercicio 2023 e no caso de empresarios ou profesionais que sexan persoas físicas, o importe da axuda será por importe de 5.000 euros. Estas axudas solicitaranse na sede electrónica da Axencia Tributaria entre os días 19 de novembro e 31 de decembro de 2024.

• Ampliación ata o 30 de xaneiro de 2025 dos prazos tributarios na presentación de declaracións e autoliquidacións e nos procedementos tributarios con vencementos nos meses de novembro e decembro de 2024.

• Facilítanse os adiamentos e fraccionamentos sen custo por xuros de mora durante os seis primeiros meses.

• Exencións no Imposto sobre Bens Inmobles e no Imposto sobre Actividades Económicas do ano 2024.