No BOE do 30 de xuño publicouse o Real Decreto-lei 18/2026, do 29 de xuño, polo que se adoptan determinadas medidas no marco do Plan Integral de Resposta á Crise en Oriente Medio.

Entre as medidas tributarias contidas neste Real Decreto-lei destacan:

• Imposto sobre hidrocarburos. Rebaixa do tipo de gravame de 15 céntimos de euro por litro no mes de xullo, de 10 céntimos de euro por litro no mes de agosto e de 5 céntimos de euro por litro no mes de setembro. Non obstante, prévénse tipos máis reducidos en agosto e setembro se en xuño ou xullo de 2026 a variación do IPC da gasolina ou do gasóleo superase en máis dun 15 %o IPC do mesmo mes de 2025.

• Imposto sobre o Valor da Produción da Enerxía Eléctrica. Introdúcense rebaixas no pagamento fraccionado deste imposto para o terceiro e cuarto trimestre de 2026. Ademais, o tipo de gravame deste Imposto será do 3,5 %para 2027, reducindose á metade do gravame establecido (7 %), e para 2028 e anos seguintes será do 0 %.

• IVE e Imposto sobre a electricidade. Prévése a posibilidade, en caso de aumento dos prezos do gas e da electricidade, de retomar as rebaixas destes impostos. Lémbrase que a partir do 1 de xuño o IVE do gas e a electricidade pasou do 10 ao 21 %e do Imposto sobre a electricidade do 0,5 ao 5,1 %.

Por último, este Real Decreto-lei reforza medidas destinadas a determinados sectores para amortecer o prezo de determinados produtos enerxéticos, xa implementadas no Real Decreto-lei 7/2026, do 20 de marzo, polo que se aproba o Plan Integral de Resposta á Crise en Oriente Medio. Nese sentido, amplíase ata finais de setembro a axuda extraordinaria e temporal para o gasóleo agrícola, unha axuda xestionada pola Axencia Tributaria. Así mesmo, tamén se ampliarán ata o 30 de setembro as axudas extraordinarias ás empresas de transporte por estrada para compensar o prezo do gasóleo de uso profesional, tanto as que teñen dereito á devolución parcial do Imposto sobre Hidrocarburos como as empresas de transporte por estrada que non se beneficien desa devolución parcial de Hidrocarburos, como autónomos, as sociedades con licenzas de transporte ou os titulares de autobuses urbanos, entre outros. Esas axudas tamén son xestionadas pola Axencia Tributaria.