Tránsito da Unión e Tránsito común

O documento de transporte electrónico como declaración de tránsito (ETD)

Introdución

A utilización do documento de transporte electrónico como declaración de tránsito da Unión/común para mercadoría transportada por vía aérea e como declaración de tránsito da Unión para mercadoría transportada por vía marítima (de agora en diante ETD) é unha das simplificacións previstas para o réxime de tránsito no artigo 233.4 do Regulamento (UE) 952/2013 e desenvolvida nos artigos 199 e 200 do Regulamento delegado (UE) 2015/2446 e nos artigos 319 e 320 do Regulamento de Execución (UE) 2015/2447 e no artigo 55 do Apéndice I do Convenio Común de tránsito.

De conformidade co que se dispón no artigo 24 do Regulamento delegado (UE) 2016/341 esta simplificación resultará aplicable a partir do 1 de maio de 2018 e substituirá ao uso dun procedemento de tránsito común/da Unión baseada na utilización dun manifesto electrónico para mercadorías transportadas por aire e ao uso dun procedemento de tránsito da Unión baseada na utilización dun manifesto electrónico para mercadorías transportadas por mar (aplicable ata o 30 de abril de 2018), actuais niveis II aire e mar.

O documento de transporte electrónico-ETD é un documento en que figuran as mercadorías que se cargan nun buque ou aeronave. Así pois, para os efectos de tránsito, o devandito documento serve como declaración de tránsito común/da Unión, sempre que conteña os elementos de datos establecidos nos anexos B-6a e A1a, apéndice III, do CTC / Columna D3 Anexo B-RDCAU e a compañía marítima/aérea dispoña dunha autorización concedida polas autoridades aduaneiras competentes.

A autorización concederase sempre que se verifique o cumprimento dos seguintes requisitos:

• O solicitante está establecido no territorio dunha parte contratante/territorio aduaneiro da Unión.

• O solicitante declara que vai utilizar regularmente o réxime de tránsito común/da Unión.

• O solicitante cumpre os criterios establecidos no artigo 39, letras a), b) e d) do Regulamento (UE) 952/2013.

• O solicitante opera un número significativo de voos/travesías entre aeroportos/portos da Unión

 Estas autorizacións solicitaranse a través das xestións desta mesma páxina.

Por ultimo, indicarlle que no suposto de que o 1 de maio de 2018 non dispoña da preceptiva autorización poderá utilizar no seu lugar o procedemento de tránsito normalizado NCTS. Neste caso deberá de dispor dunha autorización de garantía global ou dispensa de garantía.

Procedemento na aduana de partida de tránsito

A aduana de partida do tránsito é aquela que acepta as declaracións que inclúen as mercadorías no réxime de tránsito.

De conformidade co artigo 6, apartado 1 do CAU, todos os intercambios de información entre as autoridades aduaneiras e entre os operadores económicos e as autoridades aduaneiras, efectuaranse utilizando técnicas de tratamento electrónico de datos. Esta norma aplícase tamén á utilización do documento de transporte electrónico como declaración de tránsito.

A simplificación ETD baséase enteiramente no xeito en que se presenta a declaración de tránsito e os datos contidos na mesma. En todos os demais aspectos, o ETD debe tratarse como calquera outra declaración en aduana. Debe respectarse o marco xurídico detallado sobre as declaracións de aduana indicada no CTC no CAU e nos seus regulamentos de desenvolvemento ao non prever a lexislación ningunha norma especial para un procedemento simplificado de tránsito ETD.

O ETD utilizado como declaración de tránsito porase a disposición da aduana de partida para que as autoridades aduaneiras poidan efectuar unha avaliación do risco ou, se é o caso, un control das mercadorías antes de que estas poidan ser despachadas e obter o levante para o tránsito.

Polo tanto, os datos do ETD (D3) deben de ser enviados e estar dispoñibles na aduana de partida antes da saída do medio de transporte (buque, avión).

O envío do ETD realizarase por vía electrónica de conformidade coas especificacións que figuran nas Xestións desta mesma páxina

O momento en que se produza a saída do medio de transporte considerarase o momento de levante da mercadoría para o réxime de tránsito.

A utilización do ETD como declaración de tránsito non está suxeita á achega dunha garantía.

Procedemento na aduana de destino do tránsito

A aduana de destino do tránsito é aquela en que se presentan as mercadorías incluídas na declaración de tránsito ao obxecto de finalizar o réxime aduaneiro.

Os datos do ETD comunicados á aduana de partida do tránsito deben de coincidir cos datos comunicados á aduana de destino do tránsito.

Cando esta aduana de destino estea situada en territorio nacional, a comunicación á devandita aduana dos datos do ETD realizarase mediante a presentación da declaración sumaria de depósito temporal (DSDT) de forma análoga ao procedemento establecido na actualidade.