5.3.2 En que consiste

• Quen realice entregas de bens ou prestacións de servizos repercutirá o tipo impositivo do IVE que corresponda ao importe da operación, non sendo que estea exenta ou non suxeita:

  • Xeral: 21%

  • Reducido 10 %: entregas de produtos alimenticios (agás aplicación temporal do 5 %a aceites de oliva e de sementes e pastas alimenticias), bens de uso agrícola, forestal ou gandeiro, medicamentos para uso veterinario, auga, produtos farmacéuticos de uso directo polo consumidor final (guatas, gasas, vendas …), equipos médicos, aparellos e demais instrumental deseñado para uso persoal e exclusivo de persoas que teñan deficiencias físicas, mentais, intelectuais ou sensoriais, vivendas, garaxes e anexos, flores e plantas vivas e obxectos de arte. Tamén se inclúen, entre outros, os servizos de transportes de viaxeiros, obras de renovación e reparación de vivendas, hostalaría e restaurantes, actividades agrícolas, forestais e gandeiras, e servizos deportivos de carácter afeccionado, asistencia social, feiras e exposicións comerciais, salas cinematográficas, etc.

    Tamén, desde o 1 de xaneiro de 2024, aplícase a: a subministración eléctrica (ata 31 de decembro de 2024), de gas natural (ata 31 de marzo de 2024) e aos combustibles naturais (é dicir, briquetas e pellets procedentes da biomasa e madeira para leña, ata 30 de xuño de 2024).

  • Superreducido 4 %: alimentos básicos (agás aplicación temporal do 0 %a determinados alimentos), medicamentos para uso humano, libros – incluídos os libros que se subministren en calquera soporte físico, p.ex. os entregados a través de arquivos electrónicos dispostos para o seu emborcado a ferramentas de lectura ou dispositivos portátiles que permitan almacenar e ler libros dixitalizados-, xornais e revistas, material escolar, prótese, órtese e implantes internos, así como vehículos para persoas con discapacidade, vivendas de protección oficial e vivendas adquiridas por entidades dedicadas ao arrendamento, servizos de dependencia etc.. Compresas, tampóns, protegeslips, preservativos e outros anticonceptivos non medicinais.

  • Tipo 5 %: aceites de oliva e de sementes e pastas alimenticias, (desde o 1 de xaneiro de 2023 ata o 30 de xuño de 2024).

  • Tipo 0 %: determinados bens (alimentos, produtos farmacéuticos, equipos médicos, libros, xornais, revistas, subministración de auga e paneis solares) doados a entidades sen fins lucrativos que se destinen aos seus fins xerais. Determinados alimentos básicos (pan común; fariñas panificables; leite natural, certificada, pasterizada, concentrada, desnatada, esterilizada, UHT, evaporada e en po; os queixos, os ovos, as froitas, verduras, hortalizas, legumes, tubérculos e cereais, que sexan produtos naturais segundo o Código Alimentario, desde o 1 de xaneiro de 2023 ata o 30 de xuño de 2024).

• Igualmente, os provedores de bens e servizos haberánlles repercutido o IVE correspondente, que poderá deducir cumpridos certos requisitos.

• Débese calcular e se é o caso ingresar cada trimestre ou mes (grandes empresas, os inscritos na REDEME e entidades acollidas ao réxime especial do grupo de entidades) a diferenza entre o IVE reportado, é dicir, repercutido a clientes, e o IVE soportado deducible, o que repercuten os provedores.