Dedución por reversión de medidas temporais (DT 37ª.1 LIS)

1. Importe da dedución

Para os períodos impositivos iniciados a partir do 1 de xaneiro de 2015, co obxecto de mitigar os efectos da redución dos tipos de gravame na limitación á dedución de amortizacións correspondentes aos exercicios 2013 e 2014, o apartado 1 da disposición transitoria trixésimo sétima da LIS, estableceu unha nova dedución sobre a cota íntegra para os contribuíntes que tributen ao tipo xeral de gravame do Imposto sobre Sociedades.

Así, segundo o que se dispón na citada disposición, os contribuíntes que tributen ao tipo de gravame xeral previsto no artigo 29.1 da LIS e resultáselles de aplicación a limitación ás amortizacións establecidas no artigo 7 da Lei 16/2012, de 27 decembro, pola que se adoptan diversas medidas tributarias dirixidas á consolidación das finanzas públicas e ao impulso da actividade económica, terán dereito a unha dedución na cota íntegra do 5 por cento (2 por cento para os períodos impositivos que se inicien en 2015) das cantidades que integren na base impoñible do período impositivo de acordo co parágrafo terceiro do citado artigo, derivadas das amortizacións non deducidas nos períodos impositivos que se iniciasen en 2013 e 2014.

2. Formalización do modelo 200

Os contribuíntes consignarán no recadro [01040] «Dedución por reversión de medidas temporais DT 37ª.1 LIS» da páxina 14 bis do modelo 200, o importe correspondente a estas deducións que apliquen no período impositivo obxecto de declaración. O importe consignado neste recadro será o que resulte da formalización do cadro de desagregación da páxina 19 do modelo 200 que se explica a continuación.

Formalización do cadro «Dedución por reversión de medidas temporais DT 37ª.1 LIS» (páxina 19 do modelo 200)

Neste cadro deberase consignar os importes da dedución por reversión de medidas temporais xeradas nos exercicios 2015 a 2023, da forma en que se detalla a continuación:

• Na columna «Base de dedución» consignarase os importes correspondentes ás cantidades que integren na base impoñible dos exercicios 2015 a 2023, derivadas das amortizacións non deducidas nos períodos impositivos iniciados en 2013 e 2014, e sobre as que se aplica a dedución.

• Na columna «Importe xerado/pendente ao principio do período »consignarase os importes derivados de aplicar ás cantidades das columnas «Base de dedución», a porcentaxe do 2 por cento (para o período impositivo 2015) e do 5 por cento (para os períodos impositivos 2016 a 2023).

  A fila «2023 (*)» só debe cubrirse se a entidade ten deducións pendentes de aplicar, correspondentes a un período impositivo anterior iniciado en 2023.

• Na columna «Importe aplicado» consignarase os importes correspondentes ás cantidades consignadas na anterior columna «Importe xerado/pendente ao principio do período », que se aplicasen no período impositivo obxecto de declaración.

  No recadro [01040] recollerase o total dos importes consignados na columna «Aplicada nesta liquidación »que deberá trasladarse ao recadro [01040] da páxina 14 bis do modelo 200 referente á liquidación do Imposto.

• Na columna «Importe pendente» consignarase os importes correspondentes ás cantidades que queda pendente de aplicar para períodos impositivos futuros.