Deducións para incentivar a realización de determinadas actividades

Considerarase investigación á indagación orixinal e planificada que persiga descubrir novos coñecementos e unha superior comprensión no ámbito científico e tecnolóxico, e desenvolvemento á aplicación dos resultados da investigación ou doutro tipo de coñecemento científico para a fabricación de novos materiais ou produtos ou para o deseño de novos procesos ou sistemas de produción, así como para a mellora tecnolóxica substancial de materiais, produtos, procesos ou sistemas preexistentes.

Tamén se considerará actividade de investigación e desenvolvemento:

• O deseño e elaboración do mostrario para o lanzamento de novos produtos.
• A materialización dos novos produtos ou procesos nun plano, esquema ou deseño, así como a creación dun primeiro prototipo non comerciable e os proxectos de demostración inicial ou proxectos piloto, sempre que estes non poidan converterse ou utilizarse para aplicacións industriais ou para a súa explotación comercial.
• A creación, combinación e configuración de software avanzado, mediante novos teoremas e algoritmos ou sistemas operativos, linguaxes, interfaces e aplicacións destinadas á elaboración de produtos, procesos ou servizos novos ou mellorados substancialmente. Se asimilará a este concepto o software destinado a facilitar o acceso aos servizos da sociedade da información ás persoas con discapacidade, cando se realice sen fin de lucro. Non se inclúen as actividades habituais ou rutineiras relacionadas co mantemento do software ou as súas actualizacións menores.

Considerarase innovación tecnolóxica a actividade cuxo resultado sexa un avance tecnolóxico na obtención de novos produtos ou procesos de produción ou melloras substanciais dos xa existentes. Serán considerados novos aqueles produtos ou procesos cuxas características ou aplicacións, desde o punto de vista tecnolóxico, difiran substancialmente das existentes con anterioridade

Esta actividade incluirá a materialización dos novos produtos ou procesos nun plano, esquema ou deseño, así como a creación dun primeiro prototipo non comerciable, os proxectos de demostración inicial ou proxectos piloto, incluídos os relacionados coa animación e os videoxogos e os mostrarios téxtiles, da industria do calzado, do curtido, da marroquinaría, do xoguete, do moble e da madeira, sempre que non se poidan converter ou utilizar para aplicacións industriais ou para a súa explotación comercial.

Pódense establecer os seguintes criterios con respecto ao concepto de innovación tecnolóxica:

Primeiro: Novidade ou mellora substancial. O produto ou proceso obtido ou que se pretende obter ten que ser novo ou incorporar unha mellora substancial. A novidade non ten que ser meramente formal ou accesoria, senón que debe supor a existencia dun cambio esencial, unha modificación nalgunha das características básicas e intrínsecas do produto ou proceso, que atribúan unha nova natureza ao elemento modificado.

Segundo: Desde o punto de vista tecnolóxico. A novidade ten que producirse no ámbito tecnolóxico do proceso ou produto.

Terceiro: Desde un punto de vista subxectivo. Non se require a obtención dun novo produto ou proceso inexistente no mercado, senón o desenvolvemento dun novo produto ou proceso que non fose desenvolvido ata o momento pola entidade que o leva a cabo, en liña coa definición de innovación contida no Manual de Oslo, na súa nova versión elaborada no ano 2005.

A base da dedución estará constituída polo importe dos gastos de investigación e desenvolvemento e, se for o caso, polos investimentos en elementos de inmobilizado material e intanxible excluídos os edificios e terreos.

Serán considerados gastos de investigación e desenvolvemento os realizados polo contribuínte, incluídas as amortizacións dos bens afectos ás citadas actividades, cando estean directamente relacionados coas referidas actividades e se apliquen efectivamente á realización destas, constando especificamente individualizados por proxectos.

A base da dedución minorarase no importe das subvencións recibidas para o fomento das devanditas actividades e imputables como ingreso no período impositivo.

Os investimentos serán considerados realizados cando os elementos patrimoniais sexan postos en condicións de funcionamento.

Por tanto, unicamente formarán parte da base da dedución aqueles gastos que sexan directamente imputables ao proxecto de investigación e desenvolvemento. Por iso, non se poderá aplicar a dedución sobre os gastos indirectos (como poidan ser entre outros os de estrutura xeral da empresa ou os gastos financeiros) nin sobre todos os que, a pesar de teren unha relación directa coa mencionada actividade non sexan susceptibles de individualización, é dicir, de repartición entre os diferentes proxectos que se benefician da dedución e as demais actividades da empresa que poidan realizarse, ou se a referida repartición non se realizou.

A adecuada individualización por proxectos dos gastos directos incorridos en cada un deles esixe, por tanto, a concreción dos conceptos e dos importes destes, podendo determinarse por calquera método racional e presentarse en calquera formato, sempre que faga posible a posterior xustificación e proba da relación directa de cada gasto con cada proxecto e do seu importe.

A base da dedución estará constituída polo importe dos gastos do período en actividades de innovación tecnolóxica que correspondan aos seguintes conceptos:

1. Actividades de diagnóstico tecnolóxico tendentes á identificación, a definición e a orientación de solucións tecnolóxicas avanzadas, con independencia dos resultados en que culminen.
2. Deseño industrial e enxeñaría de procesos de produción, que incluirán a concepción e a elaboración dos planos, debuxos e soportes destinados a definir os elementos descritivos, especificacións técnicas e características de funcionamento necesarios para a fabricación, proba, instalación e utilización dun produto, así como a elaboración de mostrarios téxtiles, da industria do calzado, do curtido, da marroquinaría, do xoguete, do moble e da madeira.
3. Adquisición de tecnoloxía avanzada en forma de patentes, licenzas, know-how e deseños. Non darán dereito á dedución as cantidades satisfeitas a persoas ou entidades vinculadas ao contribuínte. A base correspondente a este concepto non poderá superar a contía de 1 millón de euros.

4. Obtención do certificado de cumprimento das normas de aseguramento da calidade da serie ISO 9000, GMP ou similares, sen incluír aqueles gastos correspondentes á implantación das referidas normas.

Son considerados gastos de innovación tecnolóxica os realizados polo contribuínte que estean directamente relacionados coas devanditas actividades, que se apliquen efectivamente á realización destas e que consten especificamente individualizados por proxectos.

Para determinar a base da dedución, o importe dos gastos de innovación tecnolóxica minorarase no importe das subvencións recibidas para o fomento das referidas actividades e imputables como ingreso no período impositivo.

En xeral o 25% dos gastos efectuados no período impositivo por este concepto.

No caso de que os gastos efectuados na realización de actividades de investigación e desenvolvemento no período impositivo sexan maiores que a media dos efectuados nos 2 anos anteriores, aplicarase a porcentaxe establecida no parágrafo anterior ata a devandita media, e o 42% sobre o exceso respecto desta.

Ademais da dedución que proceda conforme ao disposto nos parágrafos anteriores practicarase unha dedución adicional do 17% do importe dos gastos de persoal da entidade correspondente a investigadores cualificados adscritos en exclusiva a actividades de investigación e desenvolvemento.

A porcentaxe de dedución aplicable será o 12% dos gastos efectuados no período impositivo por este concepto.

Poderá practicarse unha dedución do 8% dos investimentos en elementos de inmobilizado material e intanxible, excluídos os edificios e terreos, sempre que estean afectos exclusivamente ás actividades de investigación e desenvolvemento.

Os elementos en que se materialice o investimento deberán permanecer no patrimonio do contribuínte, salvo perdas xustificadas, ata que cumpran a súa finalidade específica nas actividades de investigación e desenvolvemento, excepto que a súa vida útil conforme ao método de amortización, admitido na letra a) da alínea 1 do artigo 12, que se aplique, fose inferior.

Si, terán dereito á dedución por actividades de investigación e desenvolvemento ou de innovación tecnolóxica, as cantidades pagadas para a realización das referidas actividades en España ou en calquera estado membro da Unión Europea ou do Espazo Económico Europeo, por encarga do contribuínte, individualmente ou en colaboración con outras entidades.

Respecto dos gastos relacionados coas actividades realizadas no exterior, só poderán formar parte da base da dedución os vinculados a actividades realizadas en España ou en calquera Estado membro da Unión Europea ou do Espazo Económico Europeo.

Por tanto, se en relación a un proxecto de investigación se realizan actividades no exterior, en países ou territorios non comprendidos nun estado membro da Unión Europea ou dentro do Espazo Económico Europeo, os gastos en que se incorra non poderán formar parte da dedución, pero si que serán obxecto de dedución todos os gastos incorridos en España ou nalgúns deses estados, vinculados ao antedito proxecto.