Novidades de normativa 2021

Principais novidades tributarias introducidas polo RD-Lei 20/2021, do 5 de outubro, polo que se adoptan medidas urxentes para a reparación dos danos ocasionados polas erupcións volcánicas e para a reconstrución económica e social da illa de La Palma

IMPOSTO SOBRE A RENDA DAS PERSOAS FÍSÍCAS

Exención das axudas por danos persoais

O artigo 25 do Real Decreto-lei 20/2021, no seu apartado 7, concede a exención do Imposto sobre a Renda das Persoas Físicas ás axudas excepcionais por danos persoais aos afectados polas erupcións volcánicas na illa de La Palma ás que se refire o artigo 4.

Redución dos índices de rendemento neto para as actividades económicas en estimación obxectiva

O artigo 26 do Real Decreto-Lei 20/2021 prevé que a persoa titular do Ministerio de Facenda e Función Pública, á vista dos informes do Ministerio de Agricultura, Pesca e Alimentación, poida autorizar, con carácter excepcional, a redución dos índices de rendemento neto aos que se refire a Orde HAC/1155/2020, de 25 de novembro, pola que se desenvolven, para o ano 2021, o método de estimación obxectiva do Imposto sobre a Renda das Persoas Físicas e o réxime especial simplificado do Imposto sobre o Valor Engadido, para as explotacións e actividades agrarias nas que se producisen danos como consecuencia directa dos sinistros derivados das erupcións volcánicas na illa de La Palma.