A posición da AEAT nos procedementos de insolvencia

Postura da AEAT ante as propostas de convenio, plans de continuación e reestruturación

Desde a entrada en vigor da Lei 22/2003, do 9 de xullo, Concursal (de agora en diante LC), e coa nova estrutura que introduciu na clasificación e cualificación dos créditos concursais, mantida no esencial co texto refundido da Lei Concursal, aprobado por Real decreto Lexislativo 1/2020, do 5 de maio (de agora en diante TRLC), a Axencia Tributaria efectivamente veu sendo titular, nun número significativo de procedementos de insolvencia, de créditos que por imperativo da Lei vense sometidos ás condicións de pagamento que se pacten a través dos convenios, plans de continuación e reestruturación. Polo tanto, a AEAT, como o resto de axentes que participan nos procedementos de insolvencia, actúa en defensa dos seus intereses nas mesmas condicións que o resto, aínda que condicionada en boa parte por representar un tipo de créditos – o crédito público-, instrumento esencial para a satisfacción do interese xeral.

Precisamente por representar eses créditos, a Axencia Tributaria debe ser especialmente esixente á hora de avaliar as condicións de pagamento contempladas nas propostas de convenio, e de plans de continuación e reestruturación que son sometidas á aceptación polos acredores. Así, é determinante para que adopte a decisión de apoiar unha determinada proposta que esta conteña unhas condicións de pagamento que indubidablemente redunden no beneficio do crédito público que se verá afectado polo convenio ou plan correspondente.

Para conseguir este obxectivo, ante as diversas propostas de convenio, plans de continuación e reestruturación aténdese a distintos factores, entre os que cómpre destacar a existencia ou non de quitacións, a duración das posibles esperas e a proporción do crédito da Axencia Tributaria que se verá afectada pola posible proposta de convenio ou plan de continuación ou reestruturación que resulte aprobada, respecto do total dos créditos da Axencia no procedemento.

En definitiva, a AEAT trata de potenciar a súa participación nos correspondentes procedementos de insolvencia, aínda que para iso cómpre que as propostas que se propoñan sexan asumibles dentro dos parámetros indicados.